KRALENDIJK – E praktikantenan Boneriano di windsurf estilo liber no por a pone stapnan grandi den eliminashon dòbel di Kopa Mundial PWA na Fuerteventura tampoko. Youp Schmit a yega mas leu, pero a elimin’é despues di un buelta di kompetensia emoshonante. Björn Saragoza i Taty Frans tampoko por a sigui ku nan progreso.
Despues di e eliminashon individual tur surfdó den e eliminashon dòbel a haña un di dos chèns pa bringa bèk direkshon di final. Esei sinembargo e Bonerianonan no a logra.
Taty Frans a pega mesora den e promé buelta. Björn Saragoza, ku a regresá World Tour despues di djes aña, a sa di sobrebibí su promé buelta di kompetensia, pero mester a rekonosé su kontrinkante komo su superior den e di dos buelta.
Kasi un hazaña
Youp Schmit a yega mas serka di un hazaña nobo. Despues di un viktoria den su promé buelta di kompetensia el a topa e Britániko George Grisley. Pa basta ratu tabata parse ku Schmit tabata na kaminda pa un viktoria, pero ku su último maniobra Grisley a sa ainda di pasa e Boneriano. E diferensia tabata solamente un mei punto.
Na final Schmit tabata visiblemente desapuntá. Segun e Boneriano tabata falta un di su ‘double ponch’-moves ku el a efektuá ku éksito riba e formulario di skor ofisial di e hurado, mientras por a mira esei si riba e transmishon bibu.
"Mi double ponch no ta aparesé riba e blachi di puntuashon, pues esei ta un tiki straño di e hurado,” Schmit ta bisa djis despues di su buelta di kompetensia. El a entregá un protesta si, pero e mes no a fèrwagt ku esaki lo kambia algu. “E eliminashon ta sigui gewon, pues e lo no hasi un diferensia mas.”
Di djestres
Pasobra estilo liber ta un deporte di hurado i e torneo ta sigui gewon durante un protesta, un opheshon den práktika tin tiki influensia riba e marcha di e kompetensia. Finalmente a eliminá Schmit i el a finalisá na un di djestres lugá kompartí den klasifikashon final.
Ku eliminashon di Schmit, Saragoza i Frans e torneo estilo liber pa Bonerianonan a yega na un fin. E atenshon ta bai awor pa e kompetensia Slalom-X ku ta bai kuminsá awor.
Serka e hendenan hòmber Taty Frans i Amado Vrieswijk a drenta den akshon na nòmber di Bonaire. Serka e hendenan muhé nos ta mira Bobbi-Lynn i Kit de Jong na salida. Remarkabel ta ku ámbos praktikante di windsurf Boneriano ta pertenesé ainda na hubentut, pero apesar di esei ta partisipá na e torneo di seniornan.