KRALENDIJK – E Boneriano internashonal Jort van der Sande ta kontinuá su karera na Indonesia. E delantero di 30 aña a firma un kontrato ku Bali United, lokual ta yega na e nivel mas haltu di futbòl di Indonesia. E klup a anunsiá yegada di Van der Sande ofisialmente.
Segun direktor general Yabes Tanuri binida di e delantero ta un eskoho konsiente di e staf tékniko. “Nos ta anunsiá ofisialmente ku Jort van der Sande ta nos hungadó di eksterior nobo pa e temporada benidero. Su binida ta di akuerdo ku e nesesidatnan di e staf tékniko. A base di su eksperensia i su estadistanan komo delantero nos ta fèrwagt ku e por ofresé un kontribushon importante na Bali United. Nos ta spera ku e ta adaptá su mes lihé na e kompetensia Indones. Bonbiní serka Bali United i nos ta spera di alkansá éksitonan huntu”, segun Tanuri den un deklarashon di e klup.
Cambuur
Van der Sande ta bini di SC Cambuur, kaminda el a hunga un ròl importante den promoshon pa Liga Mayó. Den Keuken Kampioen Divisie e tabata bon pa nuebe gol i dos asistensia.
Ounke Van der Sande a nase 25 di yanüari 1996 na Den Bosch, e ta representá internashonalmente e ekipo nashonal di Boneiru. E delantero ta pertenesé mientrastantu algun aña kaba na e selekshon di e ekipo Boneriano i ta representá e isla durante weganan internashonal.
E atakante a kuminsá su entrenamentu di futbòl na SV Audacia i VV Heeswijk, pa despues e sigui ku e entrenamentu hubenil di FC Den Bosch. Einan el a drenta futbol pagá tambe. Despues el a hunga pa FC Eindhoven, NAC Breda i ADO Den Haag.
Durante su temporada na FC Eindhoven e tabata kompañero di ekipo di e aktual kaptan di Indonesia, Jay Idzes, ku antes a hasi e transishon di hubentut pa e prome selekshon.
Na 2024 Van der Sande a skohe pa un aventura den eksterior na Dundee United na Eskosia. Un temporada despues el a regresá Hulanda pa bisti e kamisa di SC Cambuur. Awor ta sper’é un reto den eksterior, e biaha aki na Indonesia.