KRALENDIJK – Bonaire Human Rights Organization (BHRO) ta bisa ku enseñanza na Boneiru ta enfrentando problemanan struktural den e áreanan di igualdát di oportunidat, polítika di idioma, identidát kultural, i resultadonan edukativo. Segun e organisashon, e asuntonan aki ta toka derechonan fundamental di e mucha.
BHRO ta señalá ku Boneiru histórikamente a enfrentá desbentahanan edukativo, i ta argumentá ku diferente preokupashonnan a keda presente ainda despues di e kambionan konstitushonál na aña 2010. E organisashon ta menshoná, entre otro, e posishon di Papiamentu den edukashon, representashon kultural den kurikulo, i e pregunta si edukashon ta sufisientamente konektá na e nesesidatnan di studiantenan Boneriano.
Segun BHRO, un kantidat di mayornan a dirigí nan mes na skolnan i autoridatnan gubernamental den añanan tras di lomba ku kehonan i preokupashon.
Diskushon ta nesesario
E organisashon ta argumentá ku diskushon mas profundo ta nesesario riba e kalidát i struktura di enseñanza na Boneiru, i tin e intenshon pa trese diferente aspektonan di esaki dilanti den e período benidero, for di un perspektiva histórika, legal, i di derechonan humano.