KRALENDIJK – Platforma Boneiru Nobo i mas Outónomo (PBNO) a presentá un roadmap ku diferente propuestanan pa reducí loke e organisashon ta yamá un défisit demokrátiko na Boneiru i pa fortalesé e posishon di e isla den Reino hulandes.
E motibu ta entre otro e diskushon resien durante e Overleg Parlamentario Interinsular di Reino (IPKO) tokante e influensha limitá di siudadanonan Karibense riba desishonnan ku ta tumalugá na Den Haag. Segun PBNO, habitantenan di Boneiru no tin sufisiente influensha direkto riba desishonnan ku ta wordu tumá na Den Haag i ku ta afektá nan bida diario.
Índise di Igualdat i kontrol independiente
Sentral den e Roadmap 2025-2035 ta e introdukshon di un Índise di Igualdat di Boneiru (BGI), un instrumento ku mester midi e desaroyo di igualdat material na e isla. Ademas, ta proponé institushon di un Komishon Independiente di Derechonan Igual i pa reportá anualmente tanto na e Konseho Insular komo na parlamentu hulandes riba e progreso.
E plan ta kontené tambe proposishonnan pa invershonnan èkstra den entre otro desaroyo sostenibel, edukashon i patrimonio kultural. Segun PBNO, e medidanan aki mester kontribuí na un mehorashon di e posishon sosio-ekonómiko di Boneiru.
Referèndùm na 2035
Komo toke final di e mapa, ta proponé un referèndùm na aña 2035. Na e momento ei, e poblashon lo por ekspresá nan mes riba e posishon konstitushonal futuru di Boneiru. Segun PBNO, un desishon asina por wòrdu tomá solamente despues ku durante un periodo largu a trahá riba e redukshon di diferenshanan sosial i ekonómiko.
E propuestanan ta detayá den un buki ku lo wòrdu presentá dentro di poko. Den dje tin deskribi entre otro e metodologia tras di e Índise di Igualdat di Boneiru, análisnan finansiero i diferente senario pa e desaroyo atministrativo futuro di Boneiru.
PBNO ta un inisiativa bou lidasgo di Willem A. Cecilia i ta enfoká riba e promoshon di igualdat material i un mayor grado di outo-determinashon pa Boneiru den Reino hulandes.
Lesa e document aki