KRALENDIJK – Ministerio Públiko a eksigí ayera, djaweps kastigu di prizòn pisá kontra e dos sospechosonan di e asesinato di bombero Sheldon J. na Saba. A eksigí un kastigu di prizòn di 28 aña pa Anthony N.W. Pa sospechoso komplisé Rudolfo V. v H. hustisia a eksigí 21 aña di kastigu.
A dikta e kastigunan durante tratamentu di kontenido di e asina yamá kaso Papaya na Boneiru. Riba 12 di sèptèmber 2025 a tira J. mata ora ku el a yega su kas na Saba.
“Mi no ta mira su sonrisa nunka mas”
Promé ku e rekisitorio, e parti kaminda Fiskal ta hiba palabra, sobrebibientenan a haña oportunidat pa hasi uso di derechi di bos. Famianan tabata papia visiblemente emoshoná di pèrdida di J.
Un miembro di famia ta konta ku e famia no a pèrdè solamente un ruman pero tambe un yu stimá, tata i futuro ehèmpel pa su yunan. “Nos a keda ku solamente rekuerdonan” a lesa ku awa na wowo.
E partner di J. tambe a papia. El a deskribié komo un homber positivo i afektuoso ku ken e tabata sintié seif. Segun e for di e dia ei su bida a kambia ireparabel. “Mi no ta mira su sonrisa nunka mas,” el a bisa. “E futuro ku nos kier a konstruí huntu tambe a disparsé.”
A haña kuater kartucho
Segun fiskal ta trata di un asesinato ku a prepará minusiosamente. Riba imáhennan di kámara por mira ku a opservá e alrededor promé ku e tiroteo. A tira riba J. banda di 8’or i 45 minüt di anochi ora el a yega kas ku su partner. Riba e lugá di e delito a topa ku kuater kartucho di un arma di kandela di 9 milimeter. Segun Ministerio Públiko N.W. lo tabata e tiradó.
Ministerio Públiko ta basa su mes entre otro riba imáhennan di kámara, spornan di DNA, komunikashon entre sospechosonan i deklarashonnan ku nan a hasi despues ku a arestá nan. Tambe hustisia a mustra riba kòmbersashonnan entre e sospechosonan, despues ku a trasladá nan pa Boneiru. Segun Ministerio Públiko N.W. i V.v.H. tabata papia di e investigashon i di e pregunta ku si a haña e arma di e krímen.
Sospechoso ta konsultá ku ChatGPT
Remarkabel tabata tambe ku hustisia tabata presta atenshon na búskedanan ku a haña riba telefon di e sospechosonan. Asina por ehèmpel N.W. lo a buska informashon via ChatGPT tokante konsekuensianan di un antesedente penal pa entrada pa Canada. Tambe segun Ministerio Públiko a topa ku preguntanan kon pa aktua despues di un asesinato.
Fuera di asesinato ta persiguí e sospechosonan tambe pa tira den direkshon di partner di J., poseshon di arma di kandela i delitonan di droga. Durante un entrada hudisial a topa ku mas ku dos kilo di kokaina i un kantidat di mariwana.
Defensa ta pidi apsolushon
Kontra esei abogado Bommel ta indiká ku Ministerio Públiko no a prueba ken a tira bèrdaderamente. Segun e e dosié ta konsistí pa gran parti di pruebanan indirekto. “E pregunta prinsipal ta ken e tiradó tabata. Esei te ainda no ta kla,” e abogado ta argumentá.
Segun e defensa ámbos sospechoso tabata kasi henter dia na kas. Ku V.v.H. lo tabata vigilando, manera ministerio Públiko ta indiká, Bommel ta yama un hipotésis pa kua no tin prueba direkto.
E imáhennan di kámara tampoko ta duna prueba konluyente segun e abogado. E kalidat di e imáhennan lo ta insufisiente pa bisa ku sertesa ku e persona ku a filma bèrdaderamente ta un di e sospechosonan.
Bommel a pidi apsolushon pa tantu e asesinato komo tira den direkshon di e partner di J. Pa loke ta trata e echonan di droga i arma di kandela e tabatin interogatorio pa e evidensia di Ministerio Públiko.
Último palabra
Na final di e seshon ámbos sospechoso a haña e último palabra. Anthony N.W. a insistí ku e ta inosente. “Mi no tin nada di haber ku esaki. Lagami bai bèk serka mi yunan i e personanan ku mi stima por fabor ,” el a bisa.
Rudolfo V.v.H. a indiká di ta inosente. “Mi ta konta bèrdat di loke mi a mira. Nos ta inosente. Mi ke mi libertat bèk,” segun e sospechoso.
E veredikto ta planiá pa 25 di yüni pa 1.30 PM. Lo por sigui e seshon via konekshon di video na Saba i Sint Maarten tambe.