KRALENDIJK- Èks-diputado i portabos di UPB durante e konbersashonnan pa formashon di e koalishon di gobernashon nobo Jolinda Craane, a wòrdu presentá diabièrnè anochi komo lider interino di Union Patriótiko Boneriano (UPB).
Èks-lider di partido James Kroon a introdusí Craane i a bisa ku e ta haña un honor pa pasa e batuta, pa awor temporalmente, na e lider interino di partido. Segun Kroon, e nombrashon di Craane komo lider politiko temporal ta masha meresí.
Jolinda Craane na su turno a indiká ku e tin gana pa traha riba e retonan pa e partido bèrde. "Tin kada bia mas hende ku ta indiká ku nan no por identifiká nan mes ku e manera kon e politika aktual ta worde ehersé. Komo UPB nos kier no solamente ta visibel den e periodo antis di elekshon, sino ta envolví tur tempu", asina Craane.
Kompartí preokupashon
E lider interino nobo di e partido a hasi un apelashon riba residente pa kompartí nan preokupashonnan ku e partido berde i partisipá den konversashon riba topikónan importante pa e isla.