KRALENDIJK - Djárason 24 di yüni partisipantenan di dos programa di entrenamentu den e sektor di kuido médiko a risibí nan sertifikado durante un enkuentro festivo na MBO Boneiru. E trayektonan a enfoká riba kuido sosial idunamentu di kuido individual.
E programanan di entrenamentu a keda siguí pa empleadonan di Fundashon Kuido pa Personanan Desabilitá (FKPD) i Zorg & Welzijn Groep (ZW Groep), kendenan asina a sigui desaroyá nan konosementu i abilidatnan den nan ramo. Tur dos trayekto tabata konsistí di diessinku siman di lès, siguí pa èksamennan práktiko den kua partisipantenan por a apliká nan konosementu atkerí mesora.
Un aspekto úniko di e trayekto Suministro di Kuido Individual tabata ku el a wòrdu ofresé kompletamente na Papiamentu. Hasiendo esei, MBO Boneiru tambe ta ofresé oportunidat na empleadonan ku ta deseá di desaroyá nan mes mas aleu, pero pa ken eksigensianan di idioma tin biaha ta forma un barera pa partisipá na un programa di estudio regular.
E reakshonnan di tantu partisipantenan komo dunadónan di trabou tabata partikularmente positivo. Hopi partisipante a indiká ku nan tabata gradisido pa e oportunidat di regresá skol banda di nan trabou i pa sigui desaroyá nan mes. Dunadónan di trabou tambe ta mira e balor agregá di e programanan akí, pasobra empleadonan mesora por apliká nan konosementu nobo na trabou. Ademas, e partisipantenan su motivashon i e anhelo pa siña a krea un impreshon grandi riba e dosentenan. Nan entusiasmo tabata kontagioso i a kondusí na lèsnan inspirativo i resultadonan grandi.
E trayektonan akí ta mustra eksaktamente kiko MBO Boneiru ta para p’e: duna hende e oportunidat pa sigui desaroyá nan mes. Nos ta orguyoso di tur e partisipantenan ku a tuma e reto banda di nan trabou i a kompletá e training akí ku éksito. Nan kompromiso ta fortalesé no solamente nan propio futuro, pero tambe e kalidat di kuido na Boneiru.
E rango di programanan di entrenamentu den e sektor di Kuido i Bienestar lo wòrdu ekspandé mas den e aña eskolar benidero. E kursonan di entrenamentu ta varia di sinku pa diessinku siman i ta dirigí riba desaroyo di kompetensia profeshonal, formashon adishonal, formashon kontinuo i reformashon profeshonal. Tantu partisipantenan individual komo dunadónan di trabou por hasi uso di e opshonnan di entrenamentu fleksibel aki. Ku e trayektonan akí, MBO Boneiru ta kontribuí na siñamentu pa henter bida i na un sektor di kuido médiko fuerte i ku ta prueba di futuro na Boneiru