KRALENDIJK - Minister di Enseñansa, Kultura i Siensia a otorgá aprobashon ofisialmente na e fundashon *Leren is Leuk* (Siña ta Leuk) pa lansa un di dos skol básiko na Boneiru: De Passaat. E desishon aki ta marka un logro signifikante pa e panorama edukashonal di e isla. De Passaat lo ta un skol bilingual ku hulandes i ingles komo idiomanan di instrukshon un karakterístika úniko pa Boneiru. Segun e skol, papiamentu tambe lo hunga un ròl importante denter di e konsepto edukativo aki.
E aña eskolar benidero (2026–2027) lo ta dediká kompletamente na preparashonnan, loke ta permití e skol pa habri su portanan ofisialmente den e aña eskolar 2027–2028.
Ku aprobashon di e Minister, Boneiru ta gana un fasilidat edukativo ku ta kuadra estrechamente ku e nesesidatnan di e komunidat lokal i e konteksto internashonal di e isla. De Passaat lo funshoná usando un kuríkulo moderno, bilingual. E meta ta pa muchanan siña komunika cu fluides tantu na Hulandes komo na Ingles for di un edat jong, mientras ku nan ta keda firmemente ankra den e kultura lokal.
Aña preparatorio stratégiko
Awor ku aprobashon formal a wòrdu sigurá, un aña preparatorio intensivo ta kuminsá mesora. E aña eskolar benidero lo wòrdu usá pa regla fasilidatnan, rekrutá personal bilingual kualifiká, i finalisá e kuríkulo. E proseso di inskripshon pa e promé kohort di studiantenan tambe lo wòrdu inisiá durante e periodo aki.
Direktiva di e fundashon ta deskribi esaki komo un paso historiko. Danki na e evaluashon positivo di e Ministerio, awor por kuminsá ku trabounan konkreto riba konstrukshon di un fundeshi fuerte pa enseñansa primario bilingual di kalidat haltu na Boneiru.
E fundashon a gradisí tur hende ku a sostené e organisashon durante e fase di inisiashon di e aña pasá pa trese e proposishon aki na realidat.