KRALENDIJK - Fundashon “Lesa i Skirbi Boneiru”, ku a wordu fundá djes aña pasá pa Rotary Club Bonaire, a saka e Mediabus ku ya tabata hopi gastá kava for di sirkulashon. E meta di e fundashon, esta ku ta pa lucha kontra analfabetismo fúnshonal, ta sigi ta mesun fuerte manera promé. E enfoke ta sigi riba mucha, pero awor tambe ta inkluí sosten pa hende grandi den su programanan.
Den un presentashon na Rotary Club, líder di proyekto Paul Ruijs i miembro di direktiva Soraida Mensché a konta tokante e aktividatnan resien di e fundashon.
Ku e Mediabus, e fundashon a bishita skolnan durante hopi aña pa stimulá muchanan lesa buki. Awor mayoria skolnan tin òf lo haña nan mes biblioteka, di manera ku e bus no ta nesesario mas. Pero ku esey e problema di analfabetismo fúnshonal, ku ainda ta eksistí bou di mas ku un kuart di e poblashon di Boneiru, no a keda resolvé.
P’esei, Fundashon “Lesa i Skirbi Boneiru” tambe a kuminsá ku kursonan di idioma pa hende grandi. Pa muchanan tin e programa Summer School, den kua muchanan na fin di fakansi grandi ta sigi dos siman di lès intensivo di Hulandes pa asina prepará nan mes pa e aña eskolar nobo.
Ku apoyo finansiero di Nederlands Letterenfonds, e fundashon ta hasi posibel publikashon di bukinan lokal na Papiamentu i na Hulandes. Tambe durante algun tempu e fundashon ta organisá e yamá dianan di lesa na bos haltu na skolnan i sentronan di kuido di mucha.
Komo persona di kontakto di biblionet.nl, e fundashon ta koordiná pa konteinernan yen di buki bira disponibel na Boneiru. Ademas, den kolaborashon ku Fundashon FORMA, a desaroyá un kurso di abilidadnan digital enfoká riba uso di banko via internèt kombiná ku maneho di presupuesto.
Meskos ku e fundashon ta operá independientemente kaba pa hopi aña, Rotary Club Bonaire ta sigi apoyá ku hopi entusiasmo e lucha kontra analfabetismo fúnshonal na Boneiru.