Boneiru tin dos ámtenar nobo di enseñansa obligatorio

KRALENDIJK- Enseñansa Obligatorio (𝐿𝑒𝑒𝑟𝑝𝑙𝑖𝑐ℎ𝑡) Boneiru ofisialmente tin dos ámtenar outorisá aserka. Resientemente, hefe di kuerpo di Korps Politie Caribisch Nederland (KPCN), señor Alwyn Braaf a huramentá Sue-Ann Zimmerman i Shaquira Leijnse.

Ku e huramentashon akí, ámbos ámtenar di enseñansa obligatorio ta outorisá pa ehekutá e tareanan i responsabilidatnan ku ta surgi for di Lei Enseñansa Obligatorio BES, bou di kua ta supervisá kumplimentu ku enseñansa obligatorio i, kaminda ta nesesario, ta tuma medida.

E huramentashon ta marka un paso importante pa sigui profeshonalisá e departamento di Enseñansa Obligatorio. Kolaborando den un fase tempran ku mayor, skol i partnernan di kadena, diariamente Enseñansa Obligatorio ta traha pa prevení faltamentu di skol i pèrkurá ku tur mucha ta haña oportunidat pa desaroyá nan mes optimalmente. Ora ta nesesario, danki na e outorisashon akí, por aktua ku firmesa.