KRALENDIJK – Inflashon den Karibe Hulandes a sigui subi den di dos kuartal di 2026, Ofisina Sentral di Estadístika (CBS) ta informá a base di e índise di preis na konsumidó.
Na Boneiru e preisnan tabata 3,3 porshento mas haltu ku un aña anterior i 1,8 porshento mas haltu ku e kuartal promé. Den e promé kuartal di 2026 inflashon tabata ainda 2,0 porshento riba e isla. Na Sint Eustatius e preisnan a subi ku 5,2 porshente riba base anual i 1,5 porshento kompará ku e kuartal anterior (promé kuartal: 4,6 porshento). Saba a nota un inflashon di 5,0 porshento riba base anual i 2,3 porshento kompará ku e kuartal anterior (promé kuartal: 3,4 porshento).
Riba tur tres isla kousa di e subida pa kuartal tabata spesialmente debí na gastunan haltu di transporte. Na Boneiru e preisnan di transporte a subi ku 5,6 porshento: gasolin a bira 11,7 porshento mas karu i buelonan 7,5 porshento mas karu. Bèrdura fresku tabata kosta 5,2 porshento mas tantu i horeca a bira 3,2 porshento mas karu.
Na Sint Eustatius gasolin a subi ku 7,2 porshento i buelonan ku 10,5 porshento; aki tambe bèrdura fresku a bira mas karu. Na Saba gasolin a subi asta ku 20,9 porshento i buelonan ku 9 porshento. Kuminda i bibidanan sin alkohòl a bira 2,9 porshento mas karu, spesialmente pa motibu di preisnan mas haltu pa bèrdura fresku, kuminda di fris i kòfi.