KRALENDIJK – Bonaire Hotel & Tourism Association (BONHATA) a publiká un análisas den kua e organisashon di sektor di turismo ta kritiká e manera kon prestashon di turismo na Boneiru ta ser midí.
Kombinando sifranan ofisial di yegada i di hotèl ku señalnan di negoshinan afiliá, BONHATA ta argumentá ku e kantidat di bishitante só no ta sufisiente pa mustra kuantu turismo realmente ta kontribuí na e ekonomia.
BONHATA ta señalá e ambishon di turismo di Boneiru di evitá turismo di masa, i na lugá di esei atraé bishitantenan ku ta keda mas largu, ta gasta mas, i ta añadí mas balor ekonómiko.
Okupashon di hotel ta baha
Pa sostené su kaso, BONHATA ta site sifranan di yüni 2026. E kantidat di bishitantenan ku ta keda a baha levement, kaminda e kantidat di bishitante for di Merka a kái ku 12 porshento. Okupashon di hotel a baha for di 60 pa 51 porshento, i ingreso pa kamber disponibel a kái asta ku 15 porshento. Reservashonnan pa futuro estadia den lunanan di novèmber i dezèmber tambe ta mustra di keda tras di esnan di aña pasá.
BONHATA ta raportá tambe ku nan ta risibiendo señalnan di hotèlnan, restorantnan, skolnan di sabuyamentu, kompanianan di hür outo i distribudónan. E asoshashon ta konkluí for di esaki ku e sifranan ofishal di yegada ta kapta solamente un parti di e situashon real.
BONHATA pa esei ta boga pa midi no solamente kantidat di bishitante, sino tambe gastonan ku nan ta hasi, durashon di estadia, tipo di alohamentu, merkado di orígen, i kontribushon ekonómiko di e bishitante.
Yamada pa restorá konekshonnan aéreo ku Nort-Amérika
E organisashon alabes ta hasi un yamada pa restorá konekshonnan aéreo ku Nort-Amérika, mas transparensia tokante kon e ingreso di impuesto di turista ta ser gastá, i koperashon strukturá ku Tourism Corporation Bonaire i e Entidat Públiko riba marketing i dato di merkado.
Segun BONHATA, e foko últimamente mester ta no solamente riba si turismo ta kresiendo, sino okanta ta kuantu balor ekonómiko e kresementu ei ta generá pa Boneiru i su habitantenan.