KRALENDIJK – Konseho Insular di Boneiru ke pa Konseho Ehekutivo suspendé por lo pronto e proposishon planiá pa terminá e kòntrakt di hür di e plantashi di sentebibu di Onima Aloe N.V. Den un moshon ta hasi un yamada pa ehekutá promé un revishon integral i investigá sitionan alternativo pa akomodashon di Koninklijke Marechaussee.
Segun e moshon Onima Aloe N.V. ta eksplotá for di 2002 un plantashi komersial di sentebibu riba un parsela agríkola ku Entidat Públiko Boneiru a emití komo tereno agríkola. Riba e tereno tin alrededor di 15.000 mata di sentebibu. Kolegio Ehekutivo tin e intenshon pa terminá e kòntrakt di hür pa duna e parsela un destinashon no-agrario na fabor di akomodashon di Koninklijke Marechaussee (KMAR).
Esnan ku a entregá e moshon ta mustra ku kultivo di sentebibu ta forma patrimonio agrario di Boneiru for di siglo djesnuebe. Segun nan desaparishon di e plantashi por tin konsekuensianan grave pa eksplotashon di Onima Aloe, oportunidat di trabou, mantenshon di patrimonio kultural i futuro desaroyo di sektor agrario riba e isla.
Den e moshon tin pará ku aktuashon kouteloso di gobièrnu ta eksigi ku ta prepará desishonnan radikal kouteloso i ku ta motivá nan bon. Tambe ta enfatisá ku terenonan agríkola en prinsipio mester keda disponibel pa uso agrario, a ménos ku interesnan di peso ta eksigí otro. Tambe Konseho Insular ta indiká ku mantenshon di patrimonio agrario, produkshon di kuminda lokal i diversifikashon ekonómiko ta puntonan di salida importante.
Interes agrario i históriko
P’esei Konseho Insular ta bisa ku interes agrario i históriko di e plantashi di sentebibu ta hustifiká un konsiderashon gubernamental nobo. Ta ordená Kolegio Ehekutivo pa posponé e intenshon pa terminá e kòntrakt di hür pa tres luna i ehersé den e periodo ei un rekonsiderashon integral. Na mes momento mester investigá e destinashon espasial di e parsela, konsekuensianan ekonómiko, impakto riba sektor agrario, balor kultural históriko di e plantashi, posishon hurídiko di e hürdó i posibel sitionan alternativo pa KMAR.
Tambe Kolegio Ehekutivo mester drenta den konsulta ku Onima Aloe N.V. i otro partidonan konserní pa evaluá si tin un posibel solushon ku ta sirbi tantu interes públiko komo konservashon di e empresa agrario eksistente. Mester informá Konseho Insular por eskrito pa mas tardá dentro di tres luna resultadonan di e rekonsiderashon i e alternativanan ku a analisá.
E moshon ta presentá na nòmber di frakshon di UPB. E anotashonnan riba e dokumento ta mustra ku a aprobá e moshon unánimamente, kaminda a kambia e periodo di suspenshon original di tres luna pa seis luna. E kambio aki sinembargo ta skirbí na man riba e dokumento i no ta forma parti di e teksto ku a taip.
Bonaire.nu a pidi direktor di Desaroyo Urbano Ligwini (Gino) Leito via Entidat Públiko Boneiru pa un reakshon. Pasobra Leito ta ku fakansi, OLB a laga sa ku no por reakshoná riba kontenido di e kaso. Sí entidat públiko a konfirmá ku ta hasi un investigashon interno di kon kos ta kana. Pa haña un bista kompleto den toma di desishon i e dokumentonan ku ta forma e motivashon redakshon ta konsiderá pa entregá un petishon Woo (Wet open overheid /Lei gobiernu transparente). A pidi Direktor Jaap Ensing di Onima Aloe N.V. tambe pa un reakshon. Na promé instante el a indiká di ke reakshoná, pero despues no a reakshoná riba diferente petishon di redakshon.
Lesa aki e resolushon kompleto di konseho insular di Boneiru