KRALENDIJK – E loke Selibon ta kobra pa kolektá i prosesá sushi ta yega ni pa mitar di e lokual ku tin mester pa por hasi esaki di forma sin hiba perdida. Esaki ta resultá for di e investigashon independiente riba Selibon ku a wòrdu ehekutá pa KPMG riba enkargo di e Entidat Públiko Bonaire (EPB).
Segun e rapòrt, aktualmente mas o ménos USD 2,4 milyón pa aña ta wòrdu kobrá na tarifa di sushi. Pero, pa e prosesamentu di sushi di kas i negoshi só ya tin mester di un 4,9 mion dòler pa aña. KPMG ta kalkulá asina un défisit anual di mas o ménos 2,5 mion dòler.
E investigashon ta forma parti di un análisis mas ámplio riba e situashon finansiero di Selibon i e medidanan ku ta nesesario pa hasi e kadena di sushi na Bonaire sostenibel pa futuro. A studia kiko por spera den e periodo di aña 2026 te ku aña 2028.
Esaki ta trata solamente e parti di sushi pa kas i negoshi. Pa diferente otro tipo di sushi mester ainda haña un forma di finansiamentu adishonal. Pa e motibo ei, e obligashon total di finansiamentu de realidat ta mas haltu ainda.
Posiblemente tarifanan hopi mas haltu
KPMG ta atvertí ku si tuma na kuenta tur e lokual ta neseario pa bin na un prosesamentu di sushi responsabel, i tambe e invershonnan nesesario, e tarifa ku lo mester kobra habitante i negoshi lo por bira hopi mas haltu. Segun KPMG ta skibi, lo mester disidí ainda kon e kadena di prosesamentu di sushi por wòrdu finansiá den e futuro.
Den e rapòrt ta menshoná diferente posibilidat, inkluso oumento di tarifanan eksistente, kontribushonnan adisishonal di e gobièrnu, finansiamentu eksterno òf e introdukshon di otro formanan di finansiamentu. KPMG no ta hasi rekomendashon pa un eskoho spesífiko, i ta laga esaki na gobièrnu pa disidí.
Kostonan inevitabel
E rapòrt ta yega na konklushon entre otro ku pa e periodo te ku fin di 2028 ta nesesario un total di mas di USD 40 mion pa pone Selibon na òrdu finansieramente i operashonalmente. Un parti importante di esei ta konsistí di kostonan di eksplotashon ku ta nesesario, pa laga e kadena di sushi funkshona di manera seif i konfiabel.
A yega na akuerdo pa laga KPMG hasi e estudio, komo parti di e akuerdo atministrativo entre e Entidat Públiko Bonaire i e Ministerio di Asuntunan Interno i Relashonnan di Reino (BZK), basá riba e problemátika di sushi i e lèntfel atual na Lagun.