KRALENDIJK – E lèntfel na Lagun lo mester sera promé ku fin di aña 2028, pero kon e sushi di Boneiru lo wòrdu prosesá despues di esei, ainda ta deskonosí. Esei por konkluí for di e investigashon independiente di KPMG tokante e situaron na Selibon.
Den e akuerdo atministrativo entre Entidat Públiko Boneiru (EPB) i Reino ta establesé ku promé ku 31 dezèmber 2028, e tiramentu di sushi na Lagun mester kaba. Segun KPMG, ese transishon ta pidi desishonnan rápido tokante e tratamentu futuro di e sushi, mientras ku elaborashon di alternativa ainda ta limitá.
E investigadónan ta konstatá ku Boneiru aktualmente ta enfokando prinsipalmente na stabilisashon e situashon eksistente. Na mesun momento, ainda mester wòrdu determiná kua lokalidat lo bai usa na lugá di Lagun despues di 2028. Pa esei, diferente senarionan ta riba mesa, variando di eksportashon kompleto di sushi pa eksterior, te ku un propio planta di tratamentu na Boneiru mes, òf un kombinashon di tur dos. Segun KPMG, esnan ainda mester wòrdu elaborá den un businesscase integral den kua kostonan, faktibilidat i riesgonan wòrdu pisá.
Planta di tratamentu
Un ròl importante ta reservá pa un planta di tratamentu futuro, kaminda e kanalnan di sushi por wòrdu separá i prepará pa resiklá, tratá òf eksportá. Tantu Selibon komo e EPB ya a desaroyá promé plannan pa esei. KPMG ta bisa sinembargo ku ainda ta eksistí hopi puntonan deskonsí tokante e lokalidat, diseño i e manera ku e trabou lo mester kana.
Aparte di esei, segun e rapòrt, Selibon mes ta di opinion ku realisashon di un planta di tratamentu di sushi promé ku aña 2029 no ta faktibel. Pa e motibu ei tambe, kostonan di invershon i eksplotashon di tal instalashon no ta inklui den e kálkulashonnan finansiero aktual. E promer estimashonnan ta sali for di un invershon di kasi 12 miyon di dòler, ekskluyendo gastunan pa personal, energia i mantenshon, ku ainda mester wòrdu definí.
E tempu ta primi
KPMG ta bisa ku e tempu ta kendando kòrtiku. E periodo despues di 2028 no ta pidi solamente eskohonan tékniko, sino tambe permitnan, rapòrt di efekto ambiental, desishonnan di lokalitdat, trahamentu di kòntrakt i vários otro kos. Sin desishonnan na tempu, Boneiru segun e investigadónan ta kore riesgo di yega na un situashon kaminda kuskus mester sera, mientras ku e instalashonnan nobo no ta kla ainda.
Eskohonan fundamental
E raport ta klarifia asina ku e diskushon tokante Lagun no ta kaba ku e seramentu di kuskus. Seramentu di e fasilidat na Lagun ta markando hustamente e kumienso di un fase nobo, den kua ainda mester tuma desishonnan fundamental tokante e futuro di e maneho di sushi na Boneiru.