KRALENDIJK – Selibon tin mester di aproksimadamente mas ku 40 mion dòler te fin di 2028 pa por ehersé su tareanan na Boneiru na un manera responsabel. Esei ta bini dilanti den un rapòrt di investigashon konfidensial di KPMG ku ta den man di Bonaire.nu.
Segun e rapòrt e nesesidat di kapital total di Selibon pa e periodo 2026 te ku 2028 ta suma kasi 40,1 mion dòler. Di esei alrededor di 5,1 mion ta relashoná ku invershonnan nesesario di ekipo, mashin, operashon i limpiesa públiko. E sobrá 35 mion ta relashoná ku gastunan di eksplotashon ku ta nesesario pa laga e kadena di residuo funshoná strukturalmente .
KPMG a hasi e investigashon riba órden di Entidat Públiko Boneiru (OLB) den kuadro di e areglo atministrativo ku a sera na fin di 2025 entre Boneiru i Reino pa loke ta trata aserkamentu di e problemátika di residuo rondó di Selibon i lèntfel na Lagun.
Hopi aña bou di preshon
E investigadónan a duna un bista di un kadena di residuo ku tin añanan largu kaba bou di preshon. Kandelanan ku ta keda bin bèk riba e lèntfel, invershonnan atrasá, insufisiente posibilidat di prosesamentu i un falta struktural di medionan finansiero a kondusí na e situashon aktual segun e rapòrt.
(Photo: Selibon )
For di e análisis ta resultá ku e entradanan aktual di Selibon ta kubri solamente un parti di e gastunan real. KPMG ta indiká ku e nesesidat di kapital ta surpasá ámpliamente e entradanan ku ta generá via e sistema di tarifa eksistente.
Mientrastantu kandelanan ku ta keda bin bèk ta un problema konosí i un pesadia pa e habitantenan.
Subida di tarifa supstansial
E rapòrt no ta duna rekomendashon tokante e haltura di e futuro tarifanan pa habitante- i empresanan. Sí KPMG ta atvertí ku si kalkulá tur gastu kompletamente via impuesto di residuo den e promé añanan esaki lo por kondusí na subida di tarifa supstansial.
E análisis ta forma parti di e palabrashonnan mas ámplio entre Boneiru i Reino pa bini na un kadena di residuo seif i prepará pa futuro. Ademas a palabrá ku lo mester sera lèntfel Lagun pa mas tardá fin di 2028.
E dianan benidero Bonaire.nu lo enfoká riba diferente parti di e rapòrt konfidensial. Na mes momento lo wak kousanan di e kandelanan ku ta keda ripití, e posishon finansiero di Selibon, e gastunan real di prosesamentu di sushi i e posibel konsekuensianan pa habitante-, empresanan i gobièrnu.