KRALENDIJK- Water -en Energiebedrijf Bonaire (WEB) a introdusí un faktura nobo pa su klientenan. Klientenan ku ta risibí nan faktura digitalmente ya por mira e faktura nobo. Klientenan ku ta risibí nan faktura riba papel lo risibí e faktura nobo for di djasabra awor.
Segun e kompania de utilidat, e faktura nobo tin un struktura mas kla i ta duna klientenan un mihó bista general di nan konsumo i gastunan.
Un di e karakterístikanan nobo ta e resúmen di konsumo durante e último seis lunanan. Esaki ta permití klientenan pa sigui i kompará nan uso di koriente i awa di bebe mas fásil. Pa mas informashon i splikashon tokante e faktura nobo, bishitá nos página web na www.webbonaire.com/bo-faktura.
Pronto: Portal di kliente MI WEB
Ademas di esaki, WEB Boneiru a bisa di ta trahando riba e lansamentu di un portal di kliente nobo: MI WEB. Na momento ku e portal ta disponibel, klientenan lo por wak nan fakturanan digitalmente, via un kuenta personal.