KRALENDIJK – E proyekto di investigashon arkeológiko internashonal IslandLives ta organisá djamars 23 di yüni un nochi di lansamentu públiko den Biblioteka Públiko Boneiru. E enkuentro ta dura di mitar di shete te 8’or di anochi i entrada ta grátis.
Bishitantenan ta sera konosí ku e tim di investigashon i ta tende mas di e metanan di e proyekto, e eskavashonnan ku ta tumando lugá na Klein Bonaire i e aktividatnan ku lo organisá riba e isla e añanan benidero. Tambe tin oportunidat pa hasi e investigadónan pregunta.
Bida diario ta sentral
Konseho di Investigashon Europeo (European Research Council) ta finansiá IslandLives i ta konsentrá riba historia di Aruba, Kòrsou i Boneiru. E proyekto ta investigá e bida diario di habitantenan di islanan ABC. Aki e énfasis no ta riba e historia di plantashi tradishonal, pero riba e ròl di komèrsio marítimo informal i e manera ku komunidatnan insular tabata duna forma na nan propio desaroyo sosial.
E promé fase di investigashon ta konsistí di ekskavashonnan arkeológiko na Klein Bonaire, ku ta tuma lugá na luna di yüni i yüli.
Por registrá pa e enkuentro via e website di IslandLives.