KRALENDIJK – Djasabra 27 di yüni 2026 Fundashon Wi Na Wan ta organisá e evento kultural Taste of Suriname Culture na Parke Isidel na Boneiru. Entre 6’or i 11’or pm entrada na e evento ta liber pa habitante- i bishitantenan, ku ke sera konosí ku kultura surinameño mediante kuminda, músika, idioma i tradishonnan.
E inisiativa ta tuma lugá den kuadro di luna di Emansipashon, un periodo kaminda derechonan igual, konsiensia i konekshon kultural ta para sentral. E luna ta forma tambe preparashon pa konmemorashon di pasado di sklabitut riba 1 di yüli.
Durante e evento bishitantenan por gosa entre otro di platonan surinameño, presentashon en bibu di e grupo Tes A Fesa, un bingo surinameño i tayernan di Sranan Tongo, e idioma krioyo surinameño. Pa muchanan lo tin un bounzer.
Fuera di esei e promé 75 bishitantenan lo risibí un snèkbòks grátis ku delisianan surinameño. Segun e organisashon meta di e evento ta pa hasi e komunidat surinameño mas visibel i ofresé na mes momento un manera aksesibel pa tur habitante di Boneiru sera konosí ku e kultura.