KRALENDIJK – Djasabra anochi a koroná Caroline Porras komo Miss Universe Boneiru 2026. Durante e Grand Coronation Night den e Event Center di Delfins Beach Resort el a sabi di konvensé e hurado i a laga su kompañeronan finalista Vivienne Vollebregt i Katherine Montero su tras.
Ku e viktoria aki Porras por representá Boneiru mas lat e aña aki durante elekshon internashonal di Miss Universe, kaminda partisipantenan di rònt mundu ta kompetí pa e título prestigioso.
Pa Porras e viktoria ta koronashon di lunanan largu di preparashon. Nicole Peilliker-Visser, ku a representá Boneiru aña pasá durante elekshon di Miss Universe internashonal, a entregá e korona.
Den un entrevista anterior ku Bonaire.nu Porras a konta ku su partisipashon ta bai mas leu ku solamente un sertámen di beyesa. “Mi ke mustra mundu ken Boneiru realmente ta,” el a bisa e tempu ei. Tambe el a enfatisá ku komo embahadora e ke promové spesialmente e kultura, kalor i hospitalidat di e isla.
Porras no tabata deskonosí na Boneiru. El a yega di representá e isla komo Miss Turismo Boneiru i Embahadora di Boneiru. Ku su eksperensia, perseveransia i mensahe kla el a sa di gana djasabra anochi e título di Miss Universe Boneiru 2026.
Elekshon Miss Universo
Ku e viktoria aki Caroline Porras por representá Boneiru mas lat e aña aki durante e di 75 edishon di elekshon internashonal di Miss Universe. E prestigioso evento ta tuma lugá den novèmber 2026 den Coliseo de Puerto Rico José Miguel Agrelot (El Choliseo) na San Juan, Puerto Rico, kaminda partisipantenan di rònt mundu ta kompetí pa e título mundial kudishá.