ROTTERDAM – Djasabra tabatin di nobo Zomercarnaval den sentro di siudat di Rotterdam. Promé ku e parada riba kaya alcalde Carola Schouten a risibí e invitadonan den stathùis. El a enfatisá einan e nifikashon kultural di e evento, ku for di 2023 ta riba lista internashonal di UNESCO di patrimonio no-material.
Segun Schouten Zomercarnaval ta trese e diferente kulturanan di Rotterdam serka otro i e ta un ekspreshon di pashon i kreatividat. El a gradisí tur hende ku e último mas ku kuarenta aña a komprometé nan mes pa e evento.
E parada di kaya tabata di nobo e punto kulminante. Alrededor di 2.500 bailarin, parti den 25 grupo di karnaval, a pasa ku nan garoshi di muzik i trahenan kolorido den kayanan. E ruta di mas o ménos sinku kilometer a kuminsá na Blaak.
UNESCO ra rekonosé Zomercarnaval pa motibu di e diversidat kultural di e parada. E tradishon ta sigui konstruí riba formanan di karnaval di entre otro área Karibense, Sürnam, Cabo Verde i Amerika Latino.
Anteriormente e aña aki Rotterdam Unlimited Zomercarnaval a risibí tambe e Oeuvre Prijs Rotterdam. Un biaha kada sinku aña ta otorgá e premio aki na persona- òf organisashonnan ku tin un nifikashon permanente pa e siudat i su imáhen internashonal. E hurado a elogiá e karnaval pa su kontribushon na e imáhen di Rotterdam komo un siudat habrí, inklusivo, kreativo i energétiko.