MAHO, Sint Maarten – Mas ku 90 partisipante for di tur isla hulandes di Karibe, a bini huntu djaweps atardi na Sonesta Maho Beach Resort na Sint Maarten pa un kongreso regional di penshun, organisá pa kupel di fondonan di penshun CaPAs, ku e tema ‘Pa nos futuro komun’.
E kongreso a enfoká riba e ròl di sistemanan di penshun den e generashon di prosperidat duradero i resiliente na Karibe, i a tresę huntu representantenan di fondonan di penshun, gobièrnunan, institutonan finansiero i otro partidonan interesá.
Minister interino di Finansa Nathalie Tackling a duna e diskurso durante apertura na nòmber di Ministerio di Finansa. Tackling, ku anteriormente tabata presidente di e direktiva di Algemeen Pensioenfonds Sint Maarten (APS), a suprayá e importansia di sistemanan di penshun sostenibel i koperashon regional.
Gobernador Ajamu Baly no solamente tabata tei presente na e seremonia di apertura, pero a keda pa henter e kongreso i a partisipá aktívamente den e seshonnan di trabou – algu ku e demas partisipantenan a apresiá hopi.
E programa a inkluí presentashonnan prinsipal di Daniel van Vuuren, Onno Steenbeek i Parveen Boertje, ku a trata temanan variando di kambionan demográfiko i maneho di penshun te ku edukashon finansiero i resiliensia sosial.
Despues di esaki, e partisipantenan a tuma parti den seshonnan di trabou interaktivo bou di guia di Emilio Kalmera, Johan Oldenboom i Shekinah Dare. E seshonnan aki a enfoká entre otro riba resiliensia finansiero, solidaridat intergenerashonal i sostenibilidat di e sistema di penshun, i a wòrdu apresiá pa nan karákter interaktivo i e manera ku partisipantenan a wòrdu stimulá pa mira retonan di penshun for di diferente ángulo.
Direktor di APS i presidente di CaPAs Oscar Williams ta yamando e partisipantenan bonbiní.
(Pòtret: ABC Online Media )
Hopi satisfecho
Direktor di APS Oscar Williams a bisa ku e tabata hopi satisfecho ku e manera ku e dia a kana.
"Nos a resibí hopi reakshon positivo for di e partisipantenan. E kongreso no tabata solamente tokante penshun den sentido tékniko òf finansiero, sino tokante kon sistemanan di penshun fuerte i resiliente ta kontribuí na e prosperidat general, stabilidat sosial i un behes digno pa hende den henter Karibe. E diskushonnan tabata sigifikante, tabata hopi interesante i hendenan a apresiá e oportunidat pa interkambiá di idea riba temanan ku ta importante pa e futuro di nos region", segun Williams a bisa.
Despues di klousura di a parti ofisial, e partisipantenan a kontinuá ku un momento ameno riba teras di hotel Sonesta Maho. A pesar di un awa seru korto, e ambiente a sigui animá, mientras ku e presentenan for di e diferente islanan a kontinuá e diskushonnan i a interkambiá ideanan te den oranan di anochi.
Direktiva di CaPAs por mira bèk riba otro konferensia eksitoso.
(Pòtret: ABC Online Media )