WILLEMSTAD – Entrante 1 di yüni polis di Kòrsou ta bai paga dunadónan di tep anónimo pa informashon ku ta kondusí na konfiskashon di armanan di kandela ilegal. Esei a sali na kla di un yamada nobo di polis den kuadro di e lucha kontra violensia ku arma di kandela.
Segun polis siudadanonan por duna informashon tokante poseshon ilegal di arma via e liña di tep anónimo 108. Ta garantisá anonimidat. Personanan ku duna informashon ku ta kondusí na hayasgo di arma, por haña un kompensashon finansiero pa esei.
E montantenan ta varia dependiente di e tipo di arma di kandela. Pa un arma di kandela semi-outomátiko polis ta paga 1000 florin. Pa mas arma via ún tep ta paga 300 florin. Pa armanan di kandela outomátiko òf granada e kompensashon por subi te 1600 florin. Pa armanan di kandela defekto por paga 500 florin.
Kampaña
Polis ta enfatisá ku e kampaña ta sigui despues di e promé akshon ‘Entregá bo arma i skapa un alma’, kaminda siudadanonan por a entregá armanan boluntariamente. Banda di esei segun e kuerpo a saka vários arma ilegal for di sirkulashon via listramentunan di kas i kontrolnan preventivo.
Esun ku duna un tep, ta haña segun polis un kódigo personal. Pasobra polis no ta registrá numbernan di telefon òf datonan personal via e liña 108, e dunadó di tep mes despues mester tuma kontakto pa haña sa si nan informashon a duna resultado. Pago ta sigui generalmente dos pa tres siman despues ku a finalisá e investigashon, segun polis ta relatá.
Ku e medida polis ta purba di mitigá presensia di armanan di kandela ilegal mas tantu posibel despues di un periodo di diferente insidentenan di tiramentu riba e isla.