KRALENDIJK - Durante e di 12 edishon di “Kompetensia di Lesa Bòi Antoin”, ku a tuma lugá djasabra último, dos buki nobo pa mucha a wòrdu presentá ofisialmente. Ku e publikashon aki, Fundashon Lesa Ta Dushi (FLTD) ta kontribuí un biaha mas na promoshon di lesa, skirbi i kultura boneriano entre mucha i hende grandi.
E promé buki, “Storia pa Mucha, Skirbí pa Nos Hendenan”, ta skirbí na Papiamentu i ta kontené diesdos kuenta tokante naturalesa i kultura di Boneiru. E kuentanan a wòrdu skirbí pa diesun outor ku a partisipá den un tayer di skirbi organisá pa Fundashon Lesa Ta Dushi. E buki a wòrdu publiká pa Stichting Munira i a bira realidat danki na sosten finansiero di Letterenfonds, MCB Bonaire i WEB N.V.
E di dos buki, “Fiesta di kosecha ántes/antaño”, a wòrdu skirbí pa Monica MC Clarinda i ilustrá pa Vanessa Paulina. E ta tantu na Papiamentu komo na Hulandes. E historia ta hiba mucha den e tradishon i kustumbernan relashoná ku fiesta di kosecha manera ku tabata selebrá na Boneiru den tempu pasá. Pa hasi e buki aksesibel pa mucha ku diferente nivel di lesa, e historia a wòrdu adaptá den kuater nivel di lesa AVI. E vershon original di e historia ta den e nivel mas haltu di lesa ku ta AVI E7. E buki por wòrdu usá den tur klas di skolnan básiko. E buki aki a wòrdu publiká pa Levendig Uitgever. E publikashon di e buki a bira posibel danki na sosten di Letterenfonds i Literatuur Caribe.
Tur dos buki lo wòrdu regalá na skolnan básiko i sentronan di kuido pa mucha na Boneiru. Ku esaki, Fundashon Lesa Ta Dushi ke duna tantu mucha posibel e oportunidat pa disfrutá di kuentanan ku ta konektá ku nan mes idioma i kultura.
Fundashon Lesa Ta Dushi ta ekspresá su gran apresio na tur persona i organisashon ku a kontribuí na realisashon di e bukinan aki. Spesialmente, fundashon ta gradisí outornan, boluntarionan, partnernan di kooperashon i spònsernan ku a hasi e proyekto aki posibel tantu finansieramente komo den kontenido.
Ku e dos publikashon nobo aki, Fundashon Lesa Ta Dushi ta sigui komprometé na promoshon di lesa, desaroyo di idioma i stimulashon di skirbimentu lokal na Boneiru.