DEN HAAG/KRALENDIJK – Defensor Nashonal di Pueblo ta hasi un yamada na gobièrnu Hulandes pa duna personanan indokumentá ku ta trahando na Boneiru e posibilidat pa legalisá nan estadia. Personanan ku ta biba kaba riba e isla i ta trahando un trabou pa kua tin insufisiente trahadó disponibel, mester por haña un státus di estadia segun e Defensor di pueblo.
E petishon ta pará den e relato anual di Defensor Nashonal di Pueblo di 2025. Eiden ta konkluí ku e maneho aktual ta dirigí muchu riba kombatimentu di estadia ilegal i tin muchu tiki atenshon pa e trato humano di personanan sin pèrmit di estadia. Segun e Defensor di Pueblo falta ademas un vishon kla definí di e grupo aki.
Motibu pa e rekomendashonnan ta un investigashon eksploratorio di posishon di migrantenan indokumentá na Boneiru. Eiden ta sali na kla ku mayoria ta víktima di eksplotashon laboral, gastunan haltu di alohamentu i akseso limitá na kuido médiko. Defensor Nashonal di Pueblo ta mustra ku defensor di pueblo di Kòrsou i Amnesty International anteriormente tambe a ekspresá preukupashonnan similar.
P’esei e Defensor di pueblo no ta konsehá e ministerionan konserní pa solamente drecha e mantenshon, pero tambe pa invertí den protekshon di e grupo vulnerabel aki. Aki mester tin un areglo ku ta duna e posibilidat pa regulá estadia di personanan ku tin basta dia bibá na Boneiru kaba i ku ta kontribuí na ekonomia
Ku e rekomendashonnan e Defensor Nashonal di Pueblo ta skohe spesífikamente pa un aserkamentu kaminda no solamente kumplimentu ku reglanan di imigrashon ta para sentral, pero tambe protekshon di derechonan fundamental i dignidat humano.