KRALENDIJK – For di awe, empresarionan na Boneiru, St. Eustatius i Saba por invertí di manera mas benefisioso den sostenibilidad. Qredits ta baha e tasa di interes di e Fiansa di Energia (‘Energy Loan’) di 4,95% pa 2%. E redukshon aki ta posibel danki na un subsidio adishonal di Ministerio di Asuntunan Ekonómiko i Klima ku lo kubri un mayor parti di e gastunan di interés di e empresario ku lo keda finansiá pa medio di e produkto. E tasa di interés redusí, por lo pronto, lo ta valido pa un periodo di seis luna.
E impakto di Qredits su Fiansa di Energia
Ku e redukshon di e tasa di interes, gobièrnu Hulandes ke fasilitá e invershon den sostenibilidat i hasi empresarionan ménos dependiente di preisnan variabel di elektrisidat i kombustibel. Prinsipalmente riba e islanan, unda energia hopi biaha ta relativamente karu i unda tin un gran dependensia riba kombustibel fósil. Qredits su Fiansa di Energia (‘Energy Loan’) por kontribuí direktamente na redukshon di gastunan operashonal di negoshi i un empresa mas fuerte i prepará pa futuro. Ademas, produkshon di propio energia solar tambe por kontribuí na un operashon di negoshi mas stabil.
Minister di Asuntunan Ekonómiko i Klima, Heleen Herbert: “Empresarionan ku kier invertí den solushonnan di energia sostenibel meresé un empuhe, spesialmente awor ku e tenshon den Medio Oriente ta influenshá e preis di petroli. Nos ta yuda empresarionan ku un pakete di medidanan direkto, inkluyendo e redukshon di e tasa di interes aki. Mi ta spera ku esaki ta duna e empresario alivio. Ku e medida aki nos tambe tin un mira pa futuro: dor di hasi invershon den sostenibilidad mas atraktivo, nos por bira ménos dependiente di energia na preis elevá.”
Un fiansa pa empresarionan nobo i eksistente
E ‘Energy Loan’ ta destiná pa empresarionan nobo i tambe pa esnan eksistente riba e islanan BES. Nan por bini na remarke pa un máksimo di $50.000 ku un interes fiho di 2% durante tur e termino di e fiansa. E promedio di montante finansiá ta mas o menos $27.150 i generalmente ta aplikando un termino di 5 añanan ku un pago pa luna fiho konsistiendo di interés i amortisashon.
Na òktober 2024 a introdusí e Fiansa di Energia i te ku awor a otorgá un kantidat di 8 fiansa na empresarionan riba e islanan BES. Datos ku Qredits ta dispone di dje ta mustra ku empresarionan ta usa e finansiamiento prinsipalmente pa medidanan konkreto ku ta genera impakto i rendementu mesora, manera ekiponan ku ta uza menos koriente, espasionan di negoshi mas sostenibel i invershon den panel solar.
Marco Smit, Direktór General di Qredits:
“Hopí empresarionan chikí kier bira mas sostenibel, pero nan tin nesesidat di finansiamiento ku ta pas ku nan negoshi. Ta di gran balor ku e Ministerio di Asuntunan Ekonómiko i Klima ta mira e importansia di esaki pa empresarionan i ku e subsidio adishonal riba interes ta yuda baha e barera. Ku e interes mas abou aki nos por hasi invershon den sostenibiladat, manera panel solar pa redusí gastunan di energia, vehíkulonan elétriko pa negoshi i batería pa almasená energía solar, mas aksesibel pa empresarionan chikí den Hulanda i riba e islanan BES.”
E interes adaptá di 2% ta valido for di awor i lo keda fiho durante tur e termino di e fiansa. Empresarionan riba tur e islanan BES por apliká pa e fiansa via bonaire.qredits.com.