KRALENDIJK – Organisashonnan sivil na Karibe Hulandes tin mester di autoridatnan ku realmente ta hasi algo ku denunsianan di kos riba nos islanan ku no ta bon, manier un kiebro di integridat. No tin nesesidat pa mas rapòrt, pero sí un fin na e skuifmentu di kasonan sensitivo entre e islanan i Den Haag, esei ta loke Transparency International Nederland ta pidi.
E organisashon ta basa su konklushon riba konbersashonnan ku diesdos representante di organisashonnan sivil i otro personanan involukrá. Dos partisipante a skohé keda anónimo pa motibu di e karákter konfidensial di e konbersashonnan.
Den e rapòrt, hopi di e personanan entrevistá ta menshoná patronahe, nepotismo i un kultura di silensio komo opstákulonan grandi pa bon maneho I ambiente seif pa mèldu kos robes. Segun nan, hopi habitante biaha no ta tribi di raportá nada, pa miedu di pèrdè trabou, eksklushon sosial òf otro represaya.
Sin konsekuensia
E organisashonnan ta bisa ku generalmente nan konosé e kaminda pa hasi un denunsia di aigu robes. Nan ta trese problemanan na atenshon no solamente lokalmente, sino tambe na Rijksdienst Caribisch Nederland, epresentante di Reino, ministerionan na Den Haag, politikonan i tin biaha organisashonnan internashonal. Pero nan ta nota ku nan señalnan hopi biaha no ta haña ningun seguimento visibel.
Segun e personanan entrevistá, hopi instansha ta bula pipa pa e responsabilidat pa atendé ku señalnan. Hulanda Karibense ta mustra riba Den Haag, mientras Den Haag ta mustra bèk riba e islanan. Esaki ta krea frustrashon, spesialmente tokante asuntunan ku a keda den debate públiko pa hopi tempu.
Transparency International Nederland ta pidi pa esei un diálogo struktural entre gobièrnu i organisashonnan sivil. E organisashon ta rekomendá tambe pa mehora e protekshon di personanan ku ta revelá informashon sensitivo (klokkenluiders), hasi asistensia legal mas aksesiblé pa siudadanonan i investigá kon elementonan di e reglamentashon di batidónan di bèl por wòrdu introdusí riba e islanan.
Órgano pa tur e isla
Un rekomendashon sentral ta e fundashon di un organisashon òf ret independiente pa tur e islanan, ku ta enfokando riba integridad, transparensia i bon maneho na Hulanda karibense E organisashon aki mester tin su raisnan lokalmente, pero na mes momentu keda sufisientamente independiente di e rentan politiko i administrativo.
E rapòrt ta enfatisá ku ta trata di un investigashon eksploratorio. E konbersashonnan no ta duna un imágen representativo di tur e populashon, pero segun Transparency International Nederland nan ta mustra ku organisashonnan sivil ta hunga un rol importante den saká na kla problemanan persistente.