DEN HAAG – Gabinete ta rekonosé ku aksesibilidat di e práktika notarial na Boneiru ta bou di preshon. Kontestando preguntanan di Senado a rais di informashon di Bonaire.nu e sekretario di estado di Hustisia i Seguridat ta konfirmá ku e eksperensianan deskribí tin “e atenshon di gabinete” i ku ta trahando riba solushonnan pa mehorá e servisio notarial.
Segun e sekretario di estado aksesibilidat na derecho, entre kua e práktika notarial, ta di gran importansia. E ta enfatisá ku notarionan tin un deber di ministerio i en prinsipio no por hasi distinshon entre kliente òf e tipo di kaso ku nan ta trata. Un notario por nenga solamente si tin un motibu legal bálido pa esei.
Loke sí e gabinete ta rekonosé ta ku dunamentu di servisio obligatorio por kondusí na tempu di espera largu. Ta remarká akinan ku esei no ta sosodé solamente na Boneiru, pero tambe na Hulanda Europeo.
No a registrá kehonan
Remarkabel ta ku segun informashon di Korte Komun di Hustisia no a entregá keho ofisial kontra notarionan na Boneiru den 2025.
Esei no ta nifiká outomátikamente ku tin malkontentu. A trese e wèpsait kaminda habitantenan por entregá un keho resientemente numa den publisidat. Ademas no ta kla te kon leu habitantenan a hasi uso di e prosedura di keho aki kaba den 2026.
Tambe vários habitante a indiká na Bonaire.nu ku nan ta prudente ku entregá un keho ofisial. Pasobra no por trata kehonan anónimo, nan ta teme ku esaki por tin konsekuensia pa dunamentu di servisio den futuro. Mirando e kantidat limitá di ofisina di notario na Boneiru nan tin miedu ku lo bira mas difísil despues pa yuda nan.
A trese wèpsait den publisidat despues di publikashon
E gabinete ta skirbi ku e prosedura pa entregá keho ta stipulá den Lei di profeshon notarial BES i ta deskribí tambe riba e wèpsait di Kámara di Supervishon Notarial. Debí na e informashon di Bonaire.nu tokante inseguridat rondó di e prosedura di keho Korte Komun a kompartí e informashon aki aktivamente ku prensa tambe.
A identifiká e kousanan
Segun e gabinete Koninklijke Notariële Beroepsorganisatie (KNB) a hasi riba enkargo di e ministerio na 2024 un investigashon di e opstákulonan den ámbito notarial na Boneiru, Sint Eustatius i Saba
Esaki ta mustra ku e tempunan largu di espera i e preshon eksesivo di trabou ta okashoná spesialmente un aksesibilidat difísil pa yega na datonan di entre otro Kadaster, Kámara di Komersio i registro básiko. Tambe ta parse di ta difísil pa interkambiá temporalmente personal notarial di Hulanda Europeo òf entre e islanan.
Registronan digital i mas personal
Pa enfrentá e problemanan e ministerio di Asuntunan di Interior i Relashonnan di Reino ta sigui traha riba digitalisashon di registronan di gobièrnu, di moda ku notarionan por yega mas lihé na datonan nesesario. Tambe ministerio di Hustisia i Seguridat ta investigá si por fleksibilisá e reglanan pa aporte di personal notarial.
Segun e gabinete e medidanan aki mester kontribuí na un práktika notarial mas efisiente i kondusí finalmente na un redukshon di keho i tempo di espera riba islanan BES