KRALENDIJK – Thammy Albertsz lo drenta ofisialmente den e funshon di Komandante General di Kuerpo di Bombero Hulanda Karibense entrante 16 di ougùstùs. E ta sigui Thijs Verheul, ku su periodo ta terminá dia 15 di ougùstùs.
Albertsz (35), ku a nase na Boneiru, ta traha na Kuerpo di Bombero Hulanda Karibense for di 2018. For di 2022 e ta Komandante Lokal na Boneiru, kaminda e ta responsabel pa e maneho diario di e organisashon di bombero riba e isla.
Gran honor
Den su reakshon, Albertsz a bisa ku ta un gran honor pa guia e organisashon. Segun dje, kolaborashon, konekshon i seguridat ta e prioridatnan prinsipal. For di 16 di ougùstùs, e lo ta responsabel pa liderá Kuerpo di Bombero Hulanda Karibense na Boneiru, Sint Eustatius i Saba.