KRALENDIJK – Riba iniciativa di EQ Bonaire, un delegashon di dies representantenan for di seis isla Karibense lo biaha pa Amsterdam riba 30 di yüli pa partisipá na WorldPride 2026. E delegashon lo tuma parti den un programa amplio ku ta pone énfasis riba konekshon, kompartí konosementu, derechonan humano i kolaborashon. E tema prinsipal ta Unity – huntu nos ta mas fuerte dor di komprondementu mutuo, respeto i un kompromiso komún pa igualdat.
Un di e puntonan mas importante di e bishita ta partisipashon den e Canal Pride riba 2 di ougùstùsi e Human Rights Conference riba 5, 6 i 7 di ougùstùs. Ademas, tin diferente bishitanan i reunionnan ku, entre otro, e Ministerio di Enseñansa, Kultura i Siensia (OCW), e National Coordinator against Discrimination and Racism (NCDR) i COC Nederland.
Un parti spesial di e programa ta un seshon inspiradó ku psikiater i terapeut Glenn Helberg, kende lo papia tokante e influensia ku kolonialismo a tin riba identidat, inklushon i e posishon di komunidat queer den e partinan Karibense di Reino Hulandes.
E biahe ta duna e partisipantenan e oportunidat pa siña, haña inspirashon i kompartí nan mes eksperensianan. Durante e programa nan lo konta tokante e desafionan ku komunidat LGBTQIA+ ainda ta enfrentá na diferente islanan, pero tambe tokante e pasonan importante ku a wordu tuma pa mehorá visibilidat, aseptashon i igualdat di derechonan.
Ku e partisipashon conjunto aki, e seis isla Karibense ta duna forma na e tema Unity. Dor di siña for di otro, fortifiká relashonnan i laga nan bos tende internacionalmente, nan ta sigui traha pa un futuro unda tur hende por biba komo nan mes, den seguridat, respeto i ku mesun oportunidat, sin konsiderá orientashon seksual, identidat di género òf fondo personal.