WILLEMSTAD – Kantidat di habitante di Kòrsou di 65 aña bai ariba a kasi dòbel den djessinku aña. Na komienso di 2026 e isla tabatin kasi 41.000 senior. Entretantu mas ku un kuart di poblashon ta 65-plùs.
Esei ta bini dilanti for di sifranan nobo di Ofisina Sentral di Estadístika (CBS). Entre 2011 i 2026 20.404 habitante di 65 aña bai ariba a bini aserka. Esei ta un oumento di 99,5 porshento.
Riba 1 di yanüari 2026 kasi 26 porshento di poblashon di Kòrsou tabata 65 aña bai ariba. Un aña promé esei tabata nèt algu mas ku 25 porshento. E kantidat di senior a oumentá e aña ei ku kasi 1.500, di kasi 39.500 pa kasi 41.000.
Ku esei e oumento di e kantidat di adulto mayó ta forma e parti mas grandi di e kresementu total di poblashon. Entre komienso di 2025 i komienso di 2026 Korsou a haña na final di kuenta 1.900 habitante aserka. Mas ku 77 porshento di e kresementu ei ta pa kuenta di e grupo di 65 aña bai ariba.
Segun CBS enbehesimentu a aselerá e último añanan. Entre 2011 i 2021 e kantidat di 65-plùs a krese ku kasi 44 porshento. Si wak bèk e periodo entre 2016 i 2026, e oumento ta alrededor di 64 porshento.
Hende muhé ta den mayoria
Hendenan muhé ta forma e mayoria di e poblashon di mas edat. Kòrsou tabatin na komienso di e aña aki 24.000 hende muhé i 17.000 hende hòmber di 65 aña bai ariba. Pues 59 porshento di e grupo di senior ta konsistí di hende muhé.
Segun CBS e diferensia ta relashoná entre otro ku e espektativa mas haltu di bida di hende muhé. Esei ta un averahe di 77,4 aña kompará ku 72,8 aña pa hende hòmber. Tambe poblashon total di Kòrsou ta konta ku mas hende muhé ku hende homber.
E grupo mas grandi di grandinan ta den e kategoria di edat di 65 te ku 69 aña. Despues e kantidat di habitante pa grupo di edat ta disminuí gradualmente. Den kada kategoria di edat riba 65 aña e hende muhé ta den mayoria.
E sifranan ta konfirmá ku e konstelashon di poblashon di Kòrsou ta kambia rápido. Mientras e parti di grandinan ta sigui krese, e grupo di habitante den e edat laboral proporsionalmente ta bira mas chikí. Esei por tin konsekuensia pa entre otro merkado laboral, salubridat, kuido di grandinan i aksesibilidat di penshunnan i seguridat sosial.
Kòrsou tabatin 1 di yanüari 2026 un total di 158.000 habitante, di kua kasi 41.000 tabatin por lo ménos 65 aña.