KRALENDIJK - Dia 26 di sèptèmber a tuma lugá e kambio di direktiva di Kiwanis Club of Kralendijk Bonaire. E klup ta forma parti di Kiwanis International, un organisashon internashonal di boluntario ku ta traha pa mehorá bida di mucha i hóbennan. Kiwanis a wordu fundá na 1915 na Detroit, Merka, i awendia e ta aktivo den hopi pais rondó di mundu.
Kiwanis Club of Kralendijk ta eksistí for di 2018. Durante e añanan aki, e klup a dedicá su mes na muchanan di Boneiru. Pa medio di aktividatnan pa rekoudá fondo, e klup ta finansiá proyektonan pa yuda mucha den diferente manera. Algun aktividat konosí ta K-Walk, e akshon di potrèt di Pasku, K-razy-socks pa kreá konsenshiensia tokante síndrome di Down, paketenan pa mama ku beibi, tas di skol i regalonan di Pasku.
Durante e selebrashon, a despedi e direktiva anterior i instalá e direktiva nobo. Señora Endrah Richardson a bini spesialmente for di Aruba pa e okashon. E ta e nobo Lieutenant Governor di Divishon 26, kaminda Kralendijk ta kai bou di dje. E lo apoyá i stimulá e direktiva nobo den ehekushon di nan tareanan.
Direktiva anterior
-
President: Militza Janga-Donata
-
Past President: Mimi Dongen
-
Secretary i Treasurer: Arianne Frans
-
Director of Membership: Lisette Martines
-
SLP Advisor: Emily Kocks
Direktiva nobo
-
President: Militza Janga-Donata
-
Vice-president: Marilijne Kats
-
Secretary: Emily Kocks
-
Treasurer: Lisette Martines
-
Director of Membership: Charlotte Flanegin
-
Director of Public Relations: Genevieve Hopkinson
-
SLP Advisor: Mimi Dongen
Meskos ku hopi otro klup di servisio, Kiwanis Club of Kralendijk ta eksperensiá ku ta bira kada bes mas difísil pa haña boluntario i pa tene nan envolví. P’esei, durante e aña ku a pasa, e klup a pone hopi atenshon riba atraé miembro nobo. E esfuerso aki a duna resultado: durante e anochi, a instalá sinku miembro nobo:
-
Marie Craane
-
Dina Cicilia-Soliana
-
Sovienca Beaumont
-
Sulay Lau
-
Ginelly Kocks
Marilijne Kats tambe a dirigí un palabra di gradisimentu na fotógrafo Casper Douma. E a risibí rekonosementu pa su kontribushon durante hopi aña na Kiwanis Club of Kralendijk. Entre otro, e a yuda organisá e akshon di potrèt di Pasku i a saka e potrètnan sin kobra, pa apoyá e klup i asina muchanan di Boneiru. Tambe e tabata presente na hopi okashon ofisial pa saka potrèt.
E anochi a tuma lugá na restorant El Canton. Banda di e miembronan, tabatin invitadonan di Rotary, Lions i Key Club Kibrahacha. E kódigo di bistí tabata kolónan di solo ku ta baha. E kolónan aki a uni tur hende i tabatin un nifikashon spesial.
Solo ku ta baha ta marka final di un kaminda. E ta invitá nos pa ta gradisido i pa wak bèk riba e aña di direktiva ku a pasa: un aña di dedikashon, alegria i union. E meta tabata kla: aprecia e miembronan ku ya tabata presente i, na mes tempu, duna un bon biní na hende nobo. E lasonan ku a bira mas fuerte i e miembronan nobo ku a wordu risibí lo sigui enrikese e klup. Pero solo ku ta baha no ta un final definitivo. E ta trese e promesa di un amanser nobo: un kuminsamentu nobo ku energia i oportunidatnan nobo pa e direktiva nobo.
Mimi Dongen a dirigí e programa di e anochi. Enovita Melaan a hasi un invokashon bunita, i Charlotte Flanegin huntu ku Marilijne Kats a lesa e Kiwanis Objectives.