KRALENDIJK – Un grupo di boluntario a drenta di nobo den akshon siman pasá durante un Beach Clean Up (Limpia Playa) na parti pariba di kosta di Boneiru. E partisipantenan a kolektá sushi ku laman a benta na kosta i a yena asina di nobo vários saku di sushi.
Ta organisá e akshon di limpiesa regularmente pa tene pariba di kosta di Boneiru limpi di sushi ku bientu i koriente di laman ta benta riba kosta. Tantu adulto komo mucha a partisipá na e akshon di limpiesa.
E organisashon ta pèrkurá pa entre otro saku di sushi i hanskun durante e aktividatnan. Despues Selibon ta pasa piki e sushi ku a kolektá.
Bo tambe ke yuda? Registrá e ora ei via whatsapp na Beach Clean Up Bonaire.
Clean Coast Bonaire
E grupo aki tambe ta organisá regularmente akshonnan di limpiesa. Durante e akshon di limpiesa i e listramentu di e luna aki na Te Amo Beach siudadanonan sientífiko a kolektá 961 kabitu di sigaria, 336 tapa di bòter di metal, 40 dòpi di plèstik, 38 pida glas, 57 palu di saté, 37 balòn, 12 kùp di plèstik i hopi mas.
Desafortunadamente a topa tambe ku ophetonan ku ta kai bou di prohibishon di material desechabel na Boneiru, entre otro 13 richi di plèstik i 5 fòrki di plèstik. Na tur a konta den e área ku a listra di 50 meter 2.087 item.
One Hour Clean Up power
One Hour Clean Up Power tambe ta organisá kada djasabra un limpiesa di un ora partikularmente na parti suit di Boneiru, kaminda boluntarionan ta komprometé nan mes pa durante un ora limpia e playanan i deshasí di sushi di kaya.