KRALENDIJK – Miembro di Tweede Kamer Van Brenk (50PLUS) ke pa ofresé habitantenan den besindario di e lèntfel di Selibon na Boneiru un chekeo di salú. Pa esaki el a entregá 23 di sèptèmber un moshon durante e debate tokante presupuesto di Relashonnan di Reino.
Motibu pa esaki ta e balornan di dioksina ku a subi fuertemente den e kadena alimentisio banda di Selibon. Van Brenk ta bisa den su moshon ku GGD i Entidat Públiko di Boneiru no a komuniká tokante esaki pa evitá inkietut sosial.
Den e moshon Van Brenk ta skirbi ademas ku parse ku por papia di skonde e riesgonan serio aki pa salú. A base di esei e ta pidi gobièrnu pa tuma su responsabilidat pa salú di e habitantenan.
Mester ofresé e chekeo di salú na e habitantenan den besindario di Selibon ku Pro Lagun ta representá. Van Brenk ke ademas ku ta ripití e chekeo di salú anualmente.
E moshon ta bini djis despues di e informashon di e balornan haltu di dioksina ku a konstatá serka e kabritunan rònt di Selibon. Mientrastantu e kaso a yega Tweede Kamer tambe.
Djamars 29 di sèptèmber ta vota riba e moshon den Tweede Kamer.