KRALENDIJK – Trahadónan na Hulanda karibense ku ta pèrdè nan trabou sin ku ta nan falta, lo tin derecho riba un benefisio temporal di desempleo for di dia 1 yanüari 2027. E Areglo Temporal di Provishon di Desempleo BES a keda publiká den Staatscourant djárason i asina a keda ofisialmente establesé.
E areglo ta konta for dia promé di yanüari 2027 te ku 31 desèmber 2031. Durante e periodo aki, gobièrnu sentral lo traha riba un provishon permanente di lei pa desempleo pa Boneiru, Sint Eustatius i Saba. Te ora esei ta na vigor, e reglamentu temporal ta provee un ret di seguridat pa trahadónan ku pèrdè nan trabou.
75 porshento di salario mensual
E benefisio por yega na 75 porshento di e salario mensual i tin un durashon di máksimo tres luna. E salario mensual ta wordu determiná basá riba e salario promedio di e seis luna di kaléndario, promé ku e hende a pèrdè su trabou.
Te awor, Hulanda Karibense no tabatin ningun reglamentu general di desempleo. Esnan ku tabata pèrdè nan trabou tabata kai bèk riba asistensia sosial — òf absolutamente nada. Ku e reglamentu aki, islanan BES ta haña pa promé biaha un red di seguridat kontra desempleo.
Kompará ku e Lei di Seguro di Desempleo na Hulanda Europeo, e reglamentu ta konsiderablemente mas modesto. E benefisio di WW hulandes tambe kuminsá na 75 porsentu di salario, pero dependiendo di historial di empleo por kontinuá te ku 24 luna, mientras ku e reglamentu BES ta pa tres luna so. Banda di esei, e WW holandes ta un seguro pa kua ta paga prima; e reglamentu BES ta un provishon finansiá direktamente pa e gobièrnu sentral.
Kampaña di informashon den otoño
Na e kaminda pa implementashon di e areglo, Rijksdienst Caribisch Nederland, unidad SZW lo lansa un kampaña di informashon den otoño. Dunadó di trabo i trahadónan lo wordu informá tokante e kondishonnan di e reglamentu i kon pa apliká pa esaki.
E konsepto di e arelgo a keda presentá pa konsultashon públiko na febrüari 2026. Sindikatonan, dunadó di trabou, Diálogo Sentral i entidatnan públiko tabatin oportunidat pa reakshoná. Esakinan a wòrdu tumá na konsiderashon den e vershon final. E teksto kompleto di e reglamentu por wordu haña na Staatscourant.