KRALENDIJK – Entidat Públiko Boneiru (EPB) a anunsiá tres destaho pa desaroyo di bibienda: dos pa terenonan den área Dawari i un pa prepará tereno i infrastruktura na Rincon Pariba. E destahonan ta publiká simultáneamente i partidonan interesá por inskribí pa un òf mas komponente.
Na Dawari, ta trata di e áreanan residensial C i D. Kandidatonan por entregá oferta pa un òf tur dos tereno, ku por wordu otorgá na e mesun desaroyadó òf na diferente desaroyadó.
Na Rincon Pariba, e trabounan ta inkluí stabilisashon di tereno, kamindanan di konekshon, kloaka i un instalashon desentral pa purifikashon di awa. E área ta destiná pa mas òf ménos 50 bibienda, repartí riba dos tereno residensial. E desaroyo di e bibiendanan mes no ta forma parti di e destaho aktual; esaki lo sigui den destahonan separá na un momentu posterior.
E proseso ta den man di e Programma Bureau Uitvoering Woondeal. Informashon tokante e terenonan, spesifikashonnan, kondishonnan i kriterionan di otorgashon ta disponibel riba bonairewoondeal.com.