KRALENDIJK – Fundashon Sentro Akseso Boneiru a firma djabièrnè 3 di yüli 2026 un akuerdo di kolaborashon ku Fundashon Bos di Hubentut. Ku e kolaborashon aki, tur dos organisashon ta uni forsa pa ehekutá e programa Kibrando ku Gritunan di Silensio (KGS), ku ta enfoká riba prevenshon i kombatí abusu seksual kontra menor di edat.
Sentro Akseso Boneiru, komo organisashon di ehekushon di Entidat Publiko di Boneiru, tin komo tarea pa realisá kampaña preventivo tokante violensia den kas i maltrato di mucha. Den e último añanan a mira un oumento di kasonan di abusu seksual kontra menor di edat, loke ta hasi importante pa sigui amplia konsientisashon i edukashon riba e tema aki.
Den e programa KGS, enfasis lo keda riba informá i hasi mucha i hóben mas resiliente, pa nan por rekonosé señal, indiká nan límite i sa unda nan por buska yudansa.
Eksperensia di Bos di Hubentut
Fundashon Bos di Hubentut tin mas ku binti aña di eksperensia den prevenshon i konsientisashon tokante abusu seksual kontra menor di edat. E organisashon a desaroyá material, metodo i medio di informashon na Papiamentu, dirigí pa hasi mucha i hóben konsiente di nan derecho, seguridat i límite personal di un manera aksesibel i adaptá na kultura.
Ku e akuerdo, tur dos fundashon ta akordá pa traha huntu riba ehekushon i fortalesimentu di e programa KGS na Boneiru, kombinando eksperensia i material di Bos di Hubentut ku e involvimentu lokal di Sentro Akseso Boneiru.
"E koperashon aki ta pone nos den posishon pa yega mihó serka mucha i hóben ku informashon klá, komprendibel i adekuá. Dor di traha huntu ku un partner ku tin hopi aña di eksperensia ku e tema aki, nos por fortifiká e programa KGS i kontribuí na un ambiente mas sigur pa menor di edat," segun direktora di Sentro Akseso Boneiru, Hooi-Martijn.
Den e periodo benidero, e organisashonnan lo traha huntu riba planifikashon, ehekushon i komunikashon di e programa KGS.