WILLEMSTAD – Sekretario di estado Eric van der Burg ta hasi un bishita di trabou na Aruba, Boneiru i Kòrsou di 13 te ku 17 di yüli. Durante e bishita koperashon dentro di Reino, desaroyo ekonómiko, maneho di naturalesa, prosesamentu di sushi i infrastruktura digital ta sentral.
Na Boneiru Van der Burg ta papia ku Kolegio Ehekutivo riba desaroyonan gubernamental resien. Tin planiá tambe kòmbersashonnan tokante kompania di prosesá sushi Selibon Lagun, introdukshon di transporte públiko i e Regiodeal. Mediante e areglo ei Reino ta invertí 13 mion euro den bienestar ámplio.
Ademas e sekretario di estado ta bishitá e palunan di mangel na Sorobon, bou di guia di e organisashon di naturalesa STINAPA. Einan ta trata konservashon di naturalesa, klima i medio ambiente. Tambe e ta haña splikashon na WEB Boneiru tokante produkshon di awa di bebe i koriente.
Aruba
Na Aruba Van der Burg ta papia ku gobernadó Alfonso Boekhoudt, promé minister Mike Eman i minister di Relashonnan di Reino, Enseñansa, Hubentut, Inovashon i Deporte, Gerlien Croes. Na Universidat di Aruba e ta haña un presentashon di Kingdom Start Up Program, kaminda studiantenan di Aruba, Kòrsou i Sint Maarten ta traha huntu na abilidatnan empresarial.
Debí na e temblornan resien na Venezuela Van der Burg ta bishitá tambe e Ofisina di Maneho di Krísis na Aruba. For di e ofisina ei ta kordiná ayudo pa Venezuela. E sekretario di estado ta papia einan entre otro ku miembronan di Krus Kòrá Aruba ku a bishitá Venezuela.
Ademas e ta bishitá kompania di prosesá sushi Ecotech i e empresa Vaper Trading. E empresa ei ta e promé ku a hasi uso na Aruba di Garantia di krédito MKB pa Aruba, Kòrsou i Sint Maarten, un areglo ku mester yuda empresarionan pa haña finansiamentu mas fásil.
Kòrsou
Na Kòrsou Van der Burg ta sera konosí ku promé minister Gilmar Pisas i e ta bishitá gobernadó Mauritsz de Kort. Tambe e ta bai Korte Komun di Hustisia, e korte di hustisia mas haltu pa pais- i islanan di Karibe dentro di Reino.
Den haf di Kòrsou e sekretario di estado ta haña un rekorido den presensia di minister di Desaroyo Ekonómiko Roderick Middelhof. Einan ta papia di remodelashon duradero di haf. Tambe Van der Burg ta bishitá Blue Nap Americas, e sentro di informashon ku ta atministrá pa un gran parti datonan di instanshanan gubernamental na Kòrsou.