KRALENDIJK – Den nos rúbrika ‘Bèk na Boneiru’ nos ta sigui Bonerianonan ku a lanta na Boneiru òf tin lasonan fuerte kuné, a traha òf studia den eksterior i despues a bolbe bèk. Den e di bintitres edishon nos ta papia ku Julio Martis, ku a nase na Boneiru i ku su djesnuebe aña a bai Hulanda pa traha den horeca. Despues di binti aña den siudatnan manera Alkmaar i Amsterdam el a bini su isla bèk den temporada di corona. Mientrastantu e ta kopropietario di The Bucket na Kaya Grandi. “Amsterdam tabata tur ora drùk i ku hopi bida, pero Boneiru ta keda bo kas tòg.”
Julio a lanta na Boneiru den un tempu ku e isla, segun e, tabata tur kos ménos laf pa hóbennan. “Nos tabata semper pafó” e ta konta. “Mi tabata hunga beisbòl, nabegá ku sunfish i tabata semper den movimentu ku mi amigunan.”
Segun Julio antes tabatin sufisiente kos pa hasi pa hóbennan na Boneiru. “Hende ta pensa tin biaha ku e tempu ei Boneiru tabata ketu i laf, pero no tabata asina. Nos no tabata konosé telefon ni media sosial. Nos tabata entretené nos mes semper pafó i kier a hasi algu ku nos bida. Mi ta haña lástima di mira ku e aktual hubentut ta sinta mas paden i ku televishon i media sosial a bira asina importante pa nan.”
Di Rum Runners direkshon pa Hulanda Europeo
Julio a bishitá Komunidat di Skolnan di Boneiru i despues a sigui su karera na MBO. Despues di a traha un aña na Rum Runners el a disidí, meskos ku su kompañeronan den e periodo ei di bai Hulanda Europeo. “Mi tabatin djesnuebe aña ora ku mi a bai” e ta konta. “Promé mi a bai Capelle aan de Ijssel, pero a haña skol na Heerhugowaard. Finalmente mi a biba ocho aña na Alkmaar.”
Einan el a sigui un formashon pa kòki na Horizon College. Su promé stazjenan a hib’é restorantnan den Schoorl i Bergen. Mi mester a kustumbrá, e ta bisa. “Tin biaha bo tabata sinti ku bo ta e úniko mucha hòmber di koló. Hendenan tabata keda wak bo. Pero mi tabata pensa solamente: mi a bini aki pa logra algu.”
Durante un stazje un shèf a deskubrí su talento pa kushina. Promé Julio tabata sirbi na mesa, pero no a dura hopi ku a pidié pa yuda komo kòki. “Mi no tabata sa nada ainda di tur e produkto- i téknikanan” e ta hari. “Mi mester a siña konosé tur tipo di shampiòn i siña limpia nan. Pero finalmente ta hustamente esei mi a gusta.”
Di Alkmaar pa Amsterdam
Bon mirá despues di su estudio Julio kier a bolbe Boneiru mesora. Su shèf a pensa otro. E di: bo sa solamente e base numa, bo mester haña eksperensia ainda.” Via diferente restorant Julio a bin yega finalmente na Amsterdam.
Einan el a traha entre otro den kafetaria-, teatro- i restorantnan. E tabata kushiná pa artistanan den lugánan di troka paña den teatro i a eksperensiá e bida di Amsterdam di aserka.
“Mi pashon no tabata nunka djis hasa un bifstùk” e ta konta. “Mi tabata ke pa e hendenan bira entusiasmá for di ora e tayó bini mesa, sin ku nan a purba.” “Amsterdam tabata biba semper. Kada momento di dia algu tabata pasa.”
Futbòl tambe a hunga un ròl grandi den su bida. Ya pa añanan largu Julio ta fanátiko di Ajax i tabata bai weganan i homenahe di kampionnan. “Esei tabata ègt algu di mi tempu den Amsterdam. Mi a mira e kuater kampionatonan di pais bou di guia di Frank de Boer bibu.”
Bèk pa motibu di corona
Despues di binti aña na Hulanda e pandemia di corona a kambia tur kos. Mientras ku restorantnan tabata sera i Hulanda a bira ketu ketu pa gran parti, Julio a disidí di regresá Boneiru. “Mi tabata na kas i tabata haña salario ainda, pero mi a pensa: mi ke traha. Mi mama a bisa ku akinan tur kos ta relativamente normal ainda.”
Na Boneiru el a bai traha na restorant It Rains Fishes, kaminda el a destaká lihé danki na su eksperensia. “E shèf a mira mésora kon mi tabata organisá mi lugá di traha i ku mi sa kiko mi ta hasi.”
Djis despues corona a yega Boneiru tambe. Hopi personal mester a bai kas, pero Julio por a keda. “Nan a bisami: bo a yega último, pero abo ta keda. Mi no ta lubidá esei nunka mas.”
Koproprietario di The Bucket
Mientrastantu Julio tin añanan kaba ta traha na The Bucket, kaminda aktualmente e ta kopropietario. Pero mesun importante den su storia ta e konosido palu na malekon ku tin slòf kologá den dje i kaminda su wela tabata biba.
Segun Julio e palu ei tabata einan hopi promé ku e malekon. “Antes tabatin un bich di koral einan” e ta konta. “E palu ei tabat’ei semper.”
Ora ku a konstruí e malekon tabatin menasa ku ta bai kita e palu, pero su wela a oponé fuertemente. “Mi wela a bai sinta literalmente bou di e palu pasobra e no tabata ke pa kit’é.”
Yega kas
Finalmente e palu a keda para i a adaptá e kaminda rònt di dje. Pa Julio e palu ta símbolo pa famia, historia i yega kas bèk na Boneiru.
Einan el a bin bèk despues di su regreso. “Ora mi a bolbe bèk mi a bai biba atrobe serka mi wela bou di e palu” e ta konta. Durante dia mi tabata serka dje i anochi mi tabata traha. Mester a kustumbrá si despues di Amsterdam, kaminda mi tabatin mi propio kas i mi propio bida.” Su wela a muri dos aña pasá.
E sitio bou di e palu a bira pa Julio un símbolo di yega kas. Despues di binti aña na Hulanda el a haña einan di nobo trankilidat, famia i konekshon ku Boneiru.
Banda di esei e ta atende kasi tur kos den e empresa di The Bucket. “Huub, akshonista, ta duna konseho ainda, pero bon mirá ami ta hasi tur kos di A te Z” e ta konta.
Segun Julio The Bucket a bira un sitio kaminda hendenan lokal, Hulandes, Merikano i turistanan ta bini huntu. Spesialmente durante happy hour i nochinan di deporte ta drùk. “Hustamente e públiko mesklá ei mi ta gusta. Hendenan ta bini aki huntu pa e ambiente dushi.”
Ounke e ta sinti falta di e energia di Amsterdam ratu ratu, Julio ta sintié mas i mas na kas na Boneiru. “Na Hulanda mi tabatin mi propio kas, mi propio bida i e korekore di e siudat. Pero awor ku mi tin algun aña bèk akinan atrobe, mi ta kuminsá kustumbrá di nobo ku e bida riba e isla. Na final di kuenta Boneiru ta keda spesial.”