KRALENDIJK – Tabata un momento spesial pa deporte di buseo na Boneiru. Darion Pietersz ta e promé partisipante ku a graduá eksitosamente komo Instruktor di PADI Scuba via Murphy Henar Foundation. Ku esaki e no ta solamente un ehèmpel pa Bonerianonan hóben ku ta soña di un karera den industria di buseo, pero e ta demostrá tambe ku tin mas kaminda ku ta kondusí na éksito profeshonal riba e isla.
A lanta Murphy Henar Foundation na memoria di Murphy Henar, un kolaboradó kerí di Buddy Dive Tesort ku tabata konosí pa su pashon pa laman i su disponibilidat pa komparti konosementu ku hóbennan. Segun Tina Wall, Manager di Operashon di Buseo na Buddy Dive i ku ta hopi enbolbí ku e fundashon, e meta di e fundashon ta pa brinda Bonerianonan hóben oportunidat dentro di mundu di buseo.
“Murphy tabata tuma personanan nobo semper bou di su halanan. E no tabata siña nan solamente sambuyá, pero tambe kon nan por bira un mihó profeshonal. E fundashon ta kontinuá ku e pensamentu ei,” Wall ta konta.
Di labamentu di outo pa instruktor
Darion a kuminsá su karera na Buddy Dive Resort den labamentu di outo. Di einan el a krese bai departamentu di buseo, optené su sertifikado di Maestro di Buseo i seguidamente tabata desidido pa bai pa instruktor. Ora e kier a pone e stap ei Fundashon Murphy Tenar a disidí di sostené finansieramente. Asina el a bira e prome kandidato ku e fundashon a spònser riba nivel di instruktor.
“El a nase i lanta na Boneiru i a desaroyá su mes stap pa stap,” Wall ta bisa. “Ora e kier a bira instruktor, nos a haña esei nèt e tipo di ambishon ku e fundashon ke sostené.”
Segun Wall pa hopi hóben na Boneiru no ta algu di mes pa finalisá un estudio di instruktor. E estudio ta kostoso i e idioma por forma un reto èkstra.
“Hopi hóben ta siña den diferente idioma pareu. Esei ta hasi estudionan tin biaha mas difísil. Pero ku guia, eksperensia práktiko i perseveransia nan por yega hopi leu,” segun Wall.
Rutanan alternativo pa éksito
Wall ta enfatisá ku industria di buseo ta ofresé un posibilidat balioso pa karera pa hóbennan, ku no ta sinti nan tur ora na kas den e sistema tradishonal di enseñansa.
“Buseo ta kombiná teoria ku práktika, trabou den tim, responsabilidat i kontakto ku hende. No tur hende ta resaltá den un klas, pero sierto hóben ta destaká kompletamente den un ambiente di siña kaminda guia i práktika ta sentral,” e ta splika.
E fundashon ta sostené aktualmente vários kandidato di Boneiru, tantu hóbennan ku ta traha kaba na Buddy Dive komo studiantenan ku tin interes den mundu di buseo.
Inspirashon pa otro hóben
Pa Darion Pietersz mes e ta sinti ku optené su lisensia di instruktor ta un siguiente stap importante den su karera. Riba e pregunta dikon e kier a sigui krese bai di Maestro den Buseo pa instruktor, e ta indiká ku e tabatin gana di sigui krese den e materia i kompartí su konosementu ku otronan. Mientrastantu e ta wak bèk ku orguyo riba e trayekto.
Su mensahe na otro hóben na Boneiru ta simpel: “Si bo tin un soño, bo mes mester purba. Bin eksperensiá i deskubrí si e ta algu p’abo.”
I si futuro kursistanan bin presentá serka dje? “Si, naturalmente mi ta yuda nan,” e ta bisa ku un sonrisa.
Ku e éksito di Darion Murphy Henar Foundation ta spera di inspirá mas hóben lokal pa desaroyá nan talentonan den industria di buseo i probechá di e oportunidatnan ora nan presentá.