KRALENDIJK - Entrante 24 di aprel 2026 ta adaptá e preisnan di benta pa kombustibel. A base di e preisnan di kompra mas resien i den lus di e desaroyonan internashonal riba merkado, entrante e fecha akí e preisnan nobo di benta ta na vigor pa kombustibel na Boneiru.
Preis di gasoline ta subi ku 12 sèn pa liter i disel ta subi asta 34 sèn pa liter. E preisnan ta bira 1,45 dòler pa gasoline i 1,33 dòler pa gasoil (disel). Bòternan di gas tambe ta subi na preis. Un bòter chikí lo subi ku 1 dòler i lo bai kosta 12 dòler, kaminda un bòter grandi lo bira 3 dòler mas karu i lo bai kosta 55 dòler.
Diferente komponente ta determiná e preisnan di kombustibel. Esakinan ta enserá entre otro e preis di kompra internashonal, gastu di transporte for di Kòrsou pa Boneiru, e márgennan pa almasenamentu i distribushon, akseins, ABB i otro gastunan.
E desaroyo di preis aktual ta konsekuensia di sirkunstansianan mundial. E preisnan di kombustibel ku ta oumentando tin di haber ku e tenshonnan aktual riba merkado internashonal ku tin impakto riba mundu henter. Boneiru no ta forma un eksepshon den esaki, di manera ku e preisnan nobo pa gasòil a subi konsiderabelmente.