KRALENDIJK - Water-en Energiebedrijf Bonaire N.V. (WEB) ta anunsiá e tarifanan ku lo drenta na vigor pa elektrisidat i awa di bebe for di 1 di yüli 2026. Kompará ku e tarifanan di 1 di yanüari 2026, tin tantu redukshon komo oumento di tarifa.
Redukshon – Tarifa di uso fiho
Na momentu ku a determiná e tarifanan na 1 di yanüari 2026, e ministerionan envolví ainda no tabatin sufisiente presupuesto di supsidio pa baha e tarifanan di uso fiho. WEB a traha intensivamente ku e Ministerio di Asuntunan Ekonómiko (EZK), e Ministerio di Infrastruktura i Maneho di Awa (I&W), i otro stakeholder pa haña supsidio adishonal pa e tarifanan di uso fiho. Awor tin presupuesto adishonal disponibel, loke ta hasi posibel pa baha e tarifanan di uso fiho mas ainda entrante 1 di yüli 2026.
Pa elektrisidat, e redukshon ta apliká pa tur kategorianan di konekshon. Pa konekshonnan te ku 3 × 35 Ampèr, e tarifa fiho mensual lo baha ku 25%, for di USD 47,80 pa USD 35,85 pa luna. Pa awa di bebe, e tarifa fiho mensual pa e konekshon normal di ½ dùim lo baha for di USD 11,60 pa USD 3,54 pa luna.
Pa e tarifanan di tur otro tipo di konekshonnan, nos ta referí bo na nos wèpsait.
Oumento - Tarifa di uso variabel
Komo konsekuensia di e subida konsiderabel di e preis di diesel pa motibu di e konflikto entre Merka i Iran, e kostonan pa produsí elektrisidat pa ContourGlobal Bonaire (CGB) a subi, i ku esaki e tarifa variabel di elektrisidat (pa kWh) tambe lo subi konsiderablemente.
E tarifanan variabel ku ta drenta na vigor entrante 1 di yüli 2026, lo subi for di USD 0,3868 pa 0,5021 pa kWh. Nos ke enfatisá ku WEB i CGB solamente tin influensia riba aproksimadamente 32% di e tarifa di elektrisidat. Mas o ménos 68% di e tarifa ta dependé di e preis di kombustibel. Esaki ta mustra e importansia di e inisiativa di WEB i CGB pa realisá e proyektonan di molinanan di bientu. P’esei huntu ku Openbaar Lichaam Bonaire (OLB) i otro stakeholder, CGB i WEB ta sigui traha aktivamente pa hasi e tarifanan di elektrisidat ménos dependiente di e oumento den e preis di petroli.
Oumento - Tarifa Pagabon
Debí na e kombinashon di un tarifa fiho di uso mas abou i un tarifa variabel di elektrisidat mas haltu, e tarifa Pagabon lo subi en total ku 9,6%. E tarifa lo subi for di USD 0,6062 pa USD 0,6642.
E oumento aki ta mas limitá, pa motibu ku e redukshon den e tarifanan di uso fiho ta kompensá un parti di e efekto di oumento di preis di petroli.
Fakturashon
E tarifanan periódiko nobo pa elektrisidat i awa di bebe, lo keda apliká riba e fakturanan ku periodo di uso ku fecha di inisio na yüli 2026. Pa kunsumidónan a base di Pagabon i trùk di awa ta konta ku e tarifanan nobo ta visibel dirèkt for di 1 di yüli 2026.
WEB Boneiru, CGB, OLB i otro stakeholdernan ta trahando huntu pa hasi Boneiru mas sostenibel i pa hasi e tarifanan ménos dependiente di preis di kombustibel.