KRALENDIJK – Kompania di telekomunikashon Telbo ta ofresé en lo futuro wifi grátis na djes sitio públiko na Boneiru. Ta trata di fèltnan di deporte, parkenan di hunga i sentronan di bario den sinku bario, partí den Kralendijk i Rincon. Bishitantenan por hasi komunikashon ku e ret Telbo Semper Serka DiBo.
E inisiativo, ku Telbo ta presentá bou di e nòmber Telbo Circles, ta konsentrá riba sitionan kaminda mucha- i hóbennan ta bini huntu. Na Rincon ta trata di Fèlt Antonio Trenidat i Plenchi Broertje Janga. Na Nort’i Saliña a konektá fèlt Rudy Boezem i Fèlt “Chio” Semeleer.
Kralendijk, Amboina i Tera Korá tambe
Na Kralendijk wifi ta grátis disponibel na Parke Tului i na Stadion. Tambe a proveé Sentro di Bario Amboina, Fèlt Jossy Boekhoudt i Cruijff Court na Tera Kòrá ku un konekshon.
Segun e kompania usuarionan mester skohe solamente e ret di wifi Telbo Semper Serka DiBo den e konfigurashon di nan telefon òf tèblet pa haña konekshon.