KRALENDIJK – Representantenan di institushonnan di salú mental for di e parti Karibense di Reino a reuni for di 8 pa 11 di yüni na Boneiru pa un bishita di trabou di e federashon Dutch Caribbean Mental Health (DCMH). Durante e reunion, koperashon regional, interkambio di konosimentu i e resultadonan provisorio di e Regiobeeld GGZ Área Karibense 2025 tabata para sentral.
Pa e regiobeeld a kolektá dato di kasi 10.930 kliente na Aruba, Boneiru, Kòrsou, Saba, Sint Eustatius i Sint Maarten. E sifranan provisorional ta mustra ku trastornonan psikótiko ta e problema mas komun den e kuido di salú mental, siguí pa trastornonan neurobiológiko di desaroyo manera ADHD i outismo. Na e terser lugá ta trastornonan psikososial, entre nan problemanan finansiero i tenshon den famia.
Durante e reunion, e institushonnan partisipante a diskutí kon e koperashon den e área di kolekshon di dato por wòrdu fortalesé ainda mas. Tambe e rapòrt di investigashon GGZ Carib di e Curaçao Biomedical and Health Research Institute (CBHRI) a wòrdu entregá na e miembronan di DCMH.
Koperashon ta esensial
E federashon tambe a presentá i a tene un workshop durante e konferènsia di kuido di Zorg en Jeugd Caribisch Nederland (ZJCN). Segun DCMH, koperashon entre e islanan ta esensial pa adapta e kuido di salú mental mihó na e nesesidatnan di e populashon i pa sigurá ku e kuido ta sostenibel pa futuro.