WILLEMSTAD – Sinku asistente di kuarto di operashon nobo a gradua diaranson. Nan graduashon lo yuda oumentá kapasidat di e kuartonan di operashon i mehorá kalidat i aksesibilidat di kuido di salú na Kòrsou.
Mas kapasidat den kuarto di operashon
E entrega di diploma a tuma lugá durante un seremonia special. Segun Ministerio di Salú Públiko, Medio Ambiente i Naturalesa (GMN), e graduashon ta un resultado konkreto di invershon kontinuo den edukashon i desaroyo di personal di salú lokal.
Falta di personal ta keda un reto
Sektor di salú ta enfrentá diferente reto, entre otro falta di personal i un demanda di kuido ku ta sigui oumentá. Pa e motibu ei, Ministerio di GMN ta sigui un strategia integral: for di un banda ta forma talento lokal, for di otro banda ta trata di atraé speshalistan médiko den e áreanan kaminda Kòrsou tin skarsedat.
Kooperashon ku Colombia
Ministerio ta traha den kooperashon ku institushonnan médiko na Colombia. E kolaborashon aki ta enfoká riba atraé médikonan speshalisá den áreanan kaminda Kòrsou tin falta di ekspertisio. Segun e ministerio, e speshalistanan aki tambe ta krea mas oportunidat pa profeshonalnan lokal apliká nan konosementu i sigui desaroyá nan mes.
Reakshon di minister
Minister di Salú, Medio Ambiente i Naturalesa, Tyron Boekhoudt, a felisitá e graduadonan i a gradisí tur e institushonnan di enseñansa, dosente i profeshonalnan di kuido di salú ku a kontribuí na e formashon. "Tur profeshonal di kuido di salú ku nos forma ta un invershon den futuro di Kòrsou. Awe nos no ta selebrando solamente sinku diploma, pero tambe sinku profeshonal ku lo yuda fortalesé kuido di salú pa nos pueblo," segun Boekhoudt.