KRALENDIJK – Fin di mei, e barku Augusta Luna lo sali for di Kralendijk rumbo pa Rotterdam ku mas ku 7 tòn di shushi biomédiko di hospital abordo. Esaki ta marka e di 13 biaha ku prosesadó di shushi Selibon NV, ta transportá un kònteiner di shushi di hospital for di e isla, pa un prosesamentu responsabel pafó di Boneiru: kual awor a bira un práktika standart.
Desperdisio spesial di hospital, tambe konosí komo sushi biomédiko, ta wòrdu konsiderá un frakshon di sushi peligroso debí na e riesgo di kontaminashon biomédiko. Maneho di e desperdisio aki ta someté na regulashonnan estrikto. Huntu ku produktornan i prosesadónan, Selibon NV a logra sigurá di un manera sostenibel henter e kadena di rekohé, transporte, empaketahe, envio i prosesamentu. Pa esaki a yega na akuerdonan lokal, a establesé proseduranan, i a hasi invershonnan den personal i rekursonan.
Sinembargo, kompanianan i institutonan tambe ta mará na leinan i regulashonnan estrikto, pa loke ta trata eksportashon di sushi peligroso. Tin reglanan i tratadonan internashonal pa protehá salú públiko, seguridat i medio ambiente, i pa garantisá kumplimentu. Ku asistensia di outoridatnan hulandes, Selibon NV a dominá e proseso aki, garantisando ku e eksportashon aki por keda garantisá responsablemente den futuro tambe. Esaki ta nesesario pasobra prosesamentu lokal no ta posibel ainda.
Tin kasonan similar kaminda Selibon NV tin komo meta pa sigurá e manera pa deshasí di otro frakshonnan di shushi di forma sostenibel. Segun Selibon NV, ainda tin hopi trabou pa hasi al respekto, komo ku Boneiru no tin intenshon di sigui ku landfill den futuro serkano. E práktika di eksportashon establesé awor pa un frakshon di desperdisio relativamente kompleho manera sushi biomédiko, ta sirbi komo un eksperensia balioso pa loke ta sigui, ya ku eksportashon di sushi lo mester bira e práktika standart pa Selibon NV komo un prosesadó di desperdisio den e próksimo añanan, espesialmente mirando e ekonomia di resiklahe ku ta keda oumentá.