ORANJESTAD, St. Eustatius – E kuerpo di Bombero Karibe Hulandes (BKCN) a organisá ku éksito un Siman di Bombero na St. Eustatius. Ku un programa extenso di aktividatnan edukativo i komunitario, e siman tabata tur na fabor di seguridat kontra kandela i envolvimentu di e komunidat di St. Eustatius.
Durante e Siman di Bombero, bomberonan a bishitá varios skòl primario i e skòl sekundario. Estudiantenan a risibí presentashonnan interaktivo tokante seguridat kontra kandela, prevenshon i e trabou di e kuerpo di bombero. Pa medio di kontakto direkto ku hóbennan, BKCN ta aspirá pa oumentá konsientisashon pa loke ta trata e temátika di siguridat den e komunidat.
Bomberonan a bishitá un kas di sosiego, kaminda nan a opsekiá kuminda, a hungá wega i a konbersá ku e residentenan. Ademas, nan a traha durante tur e siman pa krea un ambiente di bida mas sigur pa medio di limpiesa di palu i vegetashon.
Un momento speshal durante e siman tabata e rekonosimentu di bomberonan ku a baha ku penshun. Nan a risibí un sertifikado di apresio komo señal di agradisimentu pa nan añanan di dedikashon i kontribushon na e seguridat di St. Eustatius. Ku e seremonia akí, e kuerpo a ekspresá su respèt i gratitut pa nan kompromiso i servisio.
Konekshon
E Siman di Bombero a konektá ku e dia internashonal ‘International Firefighters Day’ riba 4 di mei, pero tabata riba tur kos tokante konekshon ku sosiedat i envolvimentu komunitario.