KRALENDIJK - Dia 15 di mei 2026, a marka e apertura ofisial di BON DOET 2026 na Seru Largu, huntu ku Greenpeace NL. Durante e apertura, kordinadó general di BON DOET, Roosje van der Hoek, a hiba palabra i a habri ofisiamentel dos dia yen di akshon, solidaridat i trabou boluntario. Sr. Timoteo Silberie, diputado di asuntunan sosial tambe a ekspresá su apresio na tur hende ku ta kontribuí ku nan tempu, energia i dedikashon durante e dos dianan speshal aki.
BON DOET 2026, un biaha mas a demostrá kon solidario nos komunidat ta i ku na momento ku nos pone man huntu, nos por logra kosnan bunita ku tin impakto real. Rònt Boneiru, diferente grupo di boluntario a uni forsa ku organisashonnan sosial i kompletá proyektonan ku entusiasmo i éksito.
Tabata inspirativo pa mira e sonrisa riba kara di nos grandinan, e entusiasmo di nos hóbennan i e ambiente di union ku a reina durante e aktividatnan. BON DOET no ta trata solamente di trabou boluntario, sino tambe di konekshon i kuido pa otro i asina konstruí un komunidat mas fuerte i solidario.
En total, mas ku 929 boluntario a kontribuí na 60 diferente djòp rònt di e isla. NGO Plataforma Boneiru ta satisfecho ku e aporte ku nos organisashon nan sosial a haña durante di BON DOET 2026.
NGO Plataforma Boneiru, Oranje Fonds i e tim di BON DOET 2026, ta gradisí tur organisashon sosial, boluntarionan i kompanianan ku a aportá i kontribuí na BONDOET 2026. E aña aki sigur nos a demostrá ku un akshon lokal, tin impakto global!
BON DOET ta un akshon di boluntario organisá pa NGO Platform Boneiru den koperashon ku Oranje Fonds i diferente organisashon sosial, pa stimulá trabou boluntario na Boneiru.