KRALENDIJK – Ministerio Públiko BES lo no investigá penalmente miembronan di e tim di krísis (COPI) i otro funshonarionan di gobièrnu konserní ku tabata responsabel pa terminá evakuashon rondó di Lèntfel Lagun despues di e kandela grandi na 2026. Esaki ta pará den un karta di fiskal mayó.
Na luna di febrüari Fundashon Pro Lagun a hasi na nòmber di Jan Verbeek denunsia na Rishèrshi Nashonal. Segun e denunsia e ámtenar- i gobernantenan konserní posiblemente a aktua ilegal ora a para e evakuashon di habitantenan sin a investigá sufisientemente eventual riesgonan pa salú komo konsekuensia di e formashon di huma.
Den su reakshon e fiskal ta rekonosé ku e situashon rondó di e lèntfel a okashoná preukupashonnan serio bou di e habitantenan. Tambe e ta mustra ku e molèster i e posibel konsekuensianan pa salubridat i medio ambiente ta realístiko. Despues di e kandela di 17 di yanüari a instituí un tim di krísis i habitantenan a haña e konseho pa bandoná nan bibienda temporalmente. A terminá e evakuashon 20 di yanüari despues ku segun outoridatnan e situashon tabata sufisientemente bou di kontrol.
Ministerio Públiko ta konkluí sinembargo ku e desishonnan ku a tuma a kai dentro di e tarea legal di gobièrnu riba tereno di dominio di krísis. Segun hurisprudensia fiho en prinsipio Estado i ámtenarnan ku ta aktua den kuadro di un tarea gubernamental eksklusivo ta gosa di inmunidat penal.
P’esei no por persiguí nan penalmente pa tal desishonnan, a ménos ku por papia di aktua pa benefisio personal òf interes propio. Segun Ministerio Públiko no tabatin dicho sirkumstansianan.
Solushonnan gubernamental
Tambe Kupers a mustra ku e problemanan rondó di Lèntfel ta eksigí solushonnan gubernamental. Intervenshonnan penal lo kontribui tiki na prevení insidentenan den futuro òf solushon di problemanan struktural rondó di e prosesadó di sushi na Boneiru.
A base di e konsiderashonnan aki Ministerio Públiko ta renunsiá tantu un investigashon penal komo persekushon di e personanan menshoná den e denunsia. Verbeek por kuminsá un asina yamá prosedura di artíkulo 15 serka Korte di Hustisia kontra e desishon aki.