KRALENDIJK – Entidat Públiko Boneiru ta hasi un yamada riba habitante i bishitante pa no duna lora salbahe kuminda. E espesie di lora protehá, konosí tambe komo Amazona barbadensis , ta biba na Boneiru ya pa miles di aña. Boneiru ta un di e último lugánan na mundu kaminda e espesie akí ta biba ainda den naturalesa.
Ounke e poblashon a krese e último añanan, e lora ta keda vulnerabel. Paranan ku hende ta duna kuminda por pèrdè nan miedu natural di hende. Konsekuentemente nan ta kore mas riesgo di haña aksidente ku outo, edifisio òf animal doméstiko. Ademas, loranan yòn por bira dependiente di hende, na lugá di siña buska kuminda natural riba nan mes.
Malesa i kuminda inadekuá
Sitionan kaminda hende ta duna kuminda ta trese riesgo èkstra. Komo ku hopi para ta bin huntu na e lugánan akí, malesa por plama fásilmente. Ademas, e kuminda ku hende ta duna hopi bia no ta kontené e nutrientenan ku lora salbahe tin mester. Segun ekspertonan, e lora mas salú ta un lora salbahe, adaptá na naturalesa di Boneiru.
Foto Rudolf Wout
Espesie protehá
Lora ta protehá pa legislashon lokal i internashonal. Ta prohibí pa stroba lora salbahe, duna nan kuminda, kapturá, kumpra òf bende nan. Entidat Públiko ta enfatisá ku lora ta un parti importante di e patrimonio natural i kultural di Boneiru. Esun ku ke gosa di e paranan akí, por hasi esei mihó den naturalesa liber.